ფინანსთა მინისტრი ნოდარ ხადური აცხადებს, რომ სახელმწიფო ლარსის საბაჟო პუნქტის ჩაკეტვით გამოწვეული პრობლემის გადასაჭრელად ალტერნატიულ გზებს ეძებს.

ამის შესახებ მინისტრმა დღეს გამართულ პრესკონფერენციაზე განაცხადა. ხადურის განცხადებით, დარიალის ხეობაში გზა მზად არ არის საიმისოდ, რომ მასზე მძიმეწონიანმა ტრაილერებმა იარონ.

"მიდის მუშაობა, რომ გზა გაიხსნას და მძიმეწონიანმა მანქანებმა გაიარონ. ჩვენ ალტერნატივებს ვეძებთ არსებული პრობლემის გადასაჭრელად, თუმცა დეტალებზე არ მინდა ახლა საუაბარი. ვაპირებ, რომ რამდენიმე დღეში ადგილზე ჩავიდე",- განაცხადა ხადურმა.

მინისტრის თქმით, ლარსის საბაჟოზე არსებული ვითარება როგორც თურქეთის, ისე სომხეთის მიმართულებით ტრანზიტს აძვირებს.