კახი კალაძე - ქვეყანაში არის სიმშვიდე, განახლების და შენების სურვილი

პოლიტიკა - 11:31, 10 Jun, 2014

1543

საქართველოს ენერგეტიკის მინისტრია კახა კალაძის განცხადებით, საქართველოში ბევრი კარგი და საჭირო პროექტია დაწყებული,- "და მასშტაბური საქმე გვაქვს ჩაფიქრებული".

ამის შესახებ ვიცე-პრემიერმა "კინტრიშაჰესის" მშენებლობის გახსნისას განაცხადა.

"ბევრი კარგი და საჭირო პროექტია დაწყებული, ბევრი დიდი და მასშტაბური საქმე გვაქვს ჩაფიქრებული. უფასო სახელმძღვანელოები, დაზღვევა, დევნილებისთვის და უმწეოებისთვის დახმარებები, ჯანდაცვის პროექტები, სოფლის მეურნეობის აღორძინება. ყველა მიმართულებით, ყველა სფეროში დაწყებულია მუშაობა, ყველა მიმართულებით გვაქვს თუნდაც პატარა საწყისი შედეგი. ქვეყანაში არის სიმშვიდე, განახლების, შენების სურვილი. ნებისმიერი თქვენგანი, ვინც მონაწილეობს ამ პროცესში, არის ახალი, უსაფრთხო და შემდგარი, ჯანმრთელი ქვეყნის შემოქმედი, არის თავისუფალი საზოგადოების სრულფასოვანი წევრი, არის კანონით და სამართლით დაცული მოქალაქე. ჩვენ ვართ ერთი გუნდი, ჩვენ ვართ ერთი მთლიანობა – ხალხი და ხელისუფლება. ჩვენ ვართ საქართველო და ერთად ვიზრუნოთ ჩვენი ქვეყნის ნათელ მომავალზე", - განაცხადა კახა კალაძემ.

როგორც კალაძემ აღნიშნა, ჰიდრორესურსის სწორი და რაციონალური ათვისება არის ძლიერი ენერგეტიკა. კალაძის განცხადებით, საქართველო არის ჰიდროპოტენციალით მდიდარი ქვეყანა.

"ჰიდროდეველოპმენტ კომპანი" 6 მგ/ვტ სიმძლავრის მშენებლობას ახორციელებს და შემდგომში 100 მეგავატამდე პროექტის განხორციელება განიხილება. ეს არის რამდენიმე ასეული მილიონის ინვესტიცია, ეს არის ძალიან ნაყოფიერი თანამშრომლობა. საქართველო არის ჰიდროპოტენციალით მდიდარი ქვეყანა. განსაკუთრებით დასაფასებელი და აღსანიშნავია ამ მხრივ აჭარის რეგიონი. ჰიდრორესურსის სწორი და რაციონალური ათვისება არის ძლიერი ენერგეტიკა, ეს კი თავის მხრივ არის მყარი საძირკველი ქვეყნის ეკონომიკის განვითარებისთვის. ძლიერი ეკონომიკა ჩვენი ქვეყნისთვის არის პრინციპულად მნიშვნელოვანი. ჩვენ შემდგარი, მდიდარი სახელმწიფოსთვის ვიბრძოლეთ და ყოველდღე მუხლჩაუხრელად ამისთვის ვშრომობთ. ეს მიწა-წყალი, ხალხი, მიზნები და ოცნებები, ეს არის ის საფუძველი, რაზეც ეყრდნობა ჩვენი ერთობა, ჩვენი ბრძოლისუნარიანობა, ჩვენი შრომის ნაყოფიერება", - აღნიშნა კალაძემ.