თეა წულუკიანი - მარიხუანას ლეგალიზაცია საქართველოში არ იგეგმება

პოლიტიკა - 11:20, 10 Jun, 2014

1825

იუსტიციის მინისტრმა თეა წულუკიანმა ტელეკომპანია "კავკასიის" ეთერში გადაცემა "ბარიერში" მარიხუნის ლეგალიზებაზე ისაუბრა.

"ისმის ბევრი სლოგანი თუ დევიზი, რომ უნდა მოხდეს მარიხუანას, თუ სხვა, ე.წ. მსუბუქი ნარკოტიკული ნივთიერებების ლეგალიზაცია ანუ დაკანონება.

ლეგალიზაცია იმას ნიშნავს, რომ თუ ვინმე მარიხუანას მოიხმარს, ეს დასჯადი არ იქნება. ლეგალიზაცია საქართველოში არ იგეგმება და ვიდრე ეს მთავრობაა, არც მარიხუანას და არც სხვა მსუბუქი ნარკოტიკული ნივთიერების მოხმარების ლეგალიზაცია – არადასჯადად ქცევა, არ დაიგეგმება.

მეორეა - სიმკაცრის საკითხი. ნარკოტიკული პოლიტიკის უწყებათაშორის საბჭოში, სადაც შედის შინაგან საქმეთა სამინისტრო, მთავარი პროკურატურა, ჯანდაცვის სამინისტრო, სასჯელაღსრულების სამინისტრო, განათლების სამინისტრო, სპორტისა და ახალგაზრდულ საქმეთა სამინისტრო, ექსპერტებთან და საერთაშორისო ორგანიზაციებთან ერთად ვიკრიბებით და ამ საკითხებზე ვმსჯელობთ.

გამოიკვეთა ტენდენცია, რომლის თანახმად, თანამედროვე საზოგადოებებში არის ასეთი მიდგომა, რომ ის ვინც მხოლოდ მომხმარებელია, უმჯობესია ითვლებოდეს ადამიანად, რომელსაც მკურნალობა სჭირდება და უფრო ჯანდაცვის სფეროს მომხმარებელი იყოს, ვიდრე ციხის. როდესაც ადამიანი აკრძალულ ნივთიარებას მოიხმარს და მას სხვა დასჯადი ქმედება არ მიუძღვის – მაგალითად, არ არის დილერი, არ არის სხვა ახალგაზრდების წამქეზებელი, არ არის, როგორც ამ ბოლო დროს ე.წ. სპაისების შემთხვევაში ხდებოდა, როცა ახალგაზრდები ერთ ბინაში იკრიბებოდნენ, იქ ერთმანთს მოხმარებისკენ აქეზებდნენ და ამ საცხოვრებელს სხვა ახალგაზრდებს უთმობდნენ. ეს კრიმინალიზებულია. ჩვენ ამ წუთს ვსაუბრობთ იმაზე, რომ ხომ არ შეიძლება ახალგაზრდები, რომელსაც ერთხელ რაღაც შეეშალა – მოიხმარა ეს ნივთიერებები და რეალურად გაუბედურდა, მაგრამ არც შემომტანია, არც გამტანია, არც მათ მოშენებას აწარმოებს, არც დილერია, ასეთ შემთხვევაში იყოს, უფრო ნაკლები სასჯელი - მხოლოდ ადმინისტრაციული წესით დასჯადი, რათა ადამიანმა მკურნალობა შესძლოს. ერთადერთი, თუკი რაიმე შეიძლება იყოს ამ მთავრობის პირობებში მსჯელობის საგანი, არის ეს",- განაცხადა თეა წულუკიანმა.
მინისტრის თქმით, ის ემხრობა იმას, რომ ვინც აღნიშნული ნივთირების შემომტანია უფრო მკაცრად დაისაჯონ, ვიდრე დღეს ისჯებიან.

";ამიტომ უწებათაშორის საბჭოში გვქონდა მსჯელობა ხომ არ შემოგვეტანა ისეთი ცნება, როგორიცაა "კომერციული ოდენობა". "კომერციულ ოდენობაში" იგულისხმება, ნივთიერებათა ისეთი დიდი ოდენობა, რომელთან ერთად პოლიცია რომ წაგაწყდება, ვერ იტყვი, რომ ეს ზამთრის მარაგია – ავტომატურად ჩაითვლება, რომ ხარ გადამყიდველი. მაგალითად, საუბარი იყო 10 კილო კანაფზე – თუკი 10 კილო კანაფი მაქვს მანქანაში, ვერ ვიტყვი, რომ ეს მარაგია", - განაცხადა თეა წულუკიანმა.
მინისტრის განცხადებით, საბჭოს ფარგლებში განხილვის საგანია ოდენობების დაზუსტება, ახალი ოდენობების შემოტანა, ნივთიერებათა სიის დაზუსტება და ნარკოტიკებთან დაკავშირებული "სისხლის სამართლის კოდექსის" მუხლების რეფორმირება.
წულუკინის თქმით, ამ მიმართულებით კონკრეტული გადაწყვეტილებები ჯერჯერობით მიღებული არ არის.