„სტიქიით დაზარალებული არც ერთი ოჯახი უყურადღებოდ არ დარჩება“, - ამის შესახებ საქართველოს პრემიერ-მინისტრმა ქედაში, სტიქიით დაზარალებულ მოსახლეობასთან შეხვედრისას განაცხადა.

მთავრობის მეთაურის განმარტებით, ზარალი უკვე დათვლილია და ყველა დაზარალებული შესაბამის ანაზღაურებას მიიღებს.

პრემიერმა მოსახლეობას ინფორმაცია მიაწოდა მის მიერ ინიცირებულ სახელმწიფო პროგრამაზე „აწარმოე საქართველოში" და განაცხადა, რომ მან ბიზნესმენების დიდი დაინტერესება გამოიწვია.

„ჩვენ გვინდა, ყველა რაიონში ავამუშაოთ საწარმოები. ადგილობრივი წარმოების განვითარების გარეშე ჩვენი ეკონომიკა ფეხზე ვერ დადგება. სახელმწიფო პროგრამა „აწარმოე საქართველოში" 1-ელ ივნისს დაიწყო და 6 ივნისს, მთავრობის სხდომაზე სამი პროექტი უკვე დავამტკიცეთ. ჩვენ ძალიან მძიმე მემკვიდრეობა გვერგო, მაგრამ ვცდილობთ, ეტაპობრივად ავაღორძინოთ ეკონომიკა, ჯანდაცვა, სპორტი, კულტურა, სოფლის მეურნეობა. ძლიერი სოფელი ძლიერი საქართველოა", - განაცხადა პრემიერ-მინისტრმა მოსახლეობასთან შეხვედრისას.

ადგილობრივებმა პრემიერთან შეხვედრისას ერთ-ერთ პრობლემად თაფლის ხარისხის შესამოწმებელი ლაბორატორიის არარსებობა დაასახელეს. როგორც გაირკვა, აღნიშნული საკითხი უახლოეს მომავალში მოგვარდება. გარდა ამისა, როგორც პრემიერს აჭარის ავტონომიური რესპუბლიკის მთავრობის თავმჯდომარემ, არჩილ ხაბაძემ განუმარტა, ქედაში მალე ფუნქციონირებას დაიწყებს ღვინის ქარხანა, ხილის გადამამუშავებელი ქარხანა და სამკერვალო ფაბრიკა, რაც მოსახლეობის დასაქმებასთან ერთად რაიონის საბაზისო პრობლემების მოგვარებას შეუწყობს ხელს.

ირაკლი ღარიბაშვილი სტიქიით დაზარალებულ ადგილობრივებთან შეხვედრის შემდეგ მიმდებარე ტერიტორიაზე შეკრებილ ქედის მოსახლეობასაც გაესაუბრა. მათ მთავრობის მეთაურს წარმატებები უსურვეს.