„ერთიანი ნაციონალური მოძრაობის“ ლიდერებს გიგა ბოკერიას და გიგი უგულავას ცაგერში მოსახლეობასთან შეხვედრისას სიტყვიერი შეურაცხყოფა მიაყენეს და კვერცხები ესროლეს.

ამის შესახებ „ნაციონალური მოძრაობის“ მიერ გავრცელებულ განცხადებაშია ნათქვამი. პარტიის ინფორმაციით, აღნიშნულ ინციდენტში „ქართული ოცნების“ ადგილობრივი ლიდერები და საკრებულოს წევრობის კანდიდატები მონაწილეობდნენ.

„ერთიანი ნაციონალური მოძრაობის“ ლიდერებს გიგა ბოკერიას და გიგი უგულავას მოსახლეობასთან შეხვედრისას დახვდნენ "ქართული ოცნების" წევრები და წინასაარჩევნო შეხვედრის ჩაშლა სცადეს. მათ "ერთიანი ნაციონალური მოძრაობის" ლიდერებს სიტყვიერი შეურაცხყოფა მიაყენეს და კვერცხები ესროლეს.

"ქართული ოცნების" მიეტ ორგანიზებულ თავდასხმაში მონაწილეობდნენ სახელისუფლებო პარტიის ადგილობრივი ლიდერები და საკრებულოს წევრობის კანდიდატები:

ლაშა კვირკველიშვილი, გოგიტა ახვლედიანი, რამაზ მირცხულავა, მირიან ხეცურიანი, თენგიზ ახვლედიანი, ნოდარ ახვლედიანი, მამუკა ჩიქოვანი.

მოვუწოდებთ საქართველოს მთავრობას შეწყვიტოს აღვირახსნილი ზეწოლის კამპანია პოლიტიკურ ოპონენტებზე და ჩაებას თანაბარ პოლიტიკურ კონკურენციაში. მთავრობა,რომელსაც არ გააჩნია შესათავაზებელი საქმეები,ცდილობს ოპონენტებს ხელი შეუშალოს კამპანიაში. ამ და ძალადობის სხვა ფაქტების გამოძიბა იქნება მორიგი ტესტი მთავრობისთვის. მომხდარზე პასუხისმგებლობა მთლიანად ეკისრება საქართველოს მთავრობას და პირადად პრემიერ ირაკლი ღარიბაშვილს“, - ნათქვამია განცხადებაში.