"ტელეარხ 25"-ის ჟურნალისტი ჯაბა ანანიძე აჭარის უმაღლესი საბჭოს ადამიანის უფლებათა დაცვის საკითხთა კომისიის თავმჯდომარეს მედეა ვასაძეს მის მიმართ შანტაჟში ადანაშაულებს.

ჯაბა ანანიძემ ბათუმის დემოკრატიული ჩართულობის ცენტრში მედიისა და არასამთავრობო ორგანიზაციების წარმომადგენლებს 13-წუთიანი სატელეფონო ჩანაწერი წარუდგინა. ჩანაწერში ჩანს, რომ მედეა ვასაძე ჯაბა ანანიძეს მის მიერ მომზადებული საგამოძიებო ფილმის - "უმაღლესი კომფორტით"დეტალებზე ესაუბრება.

ანანიძის თქმით, მედეა ვასაძის წინააღმდეგ პროკურატურას სარჩელით დღესვე მიმართავს.

"საუბარი შეეხებეოდა დოდო დიასამიძეს, რომელიც მედეა ვასაძეს ფიზიკური შეურაცხყოფის მიყენებაში ადანაშაულებს. აღნიშნულ ჩანაწერში დეპუტატი იყენებს სიძულვილის ენას, ჩანაწერის გასაჯაროების უფლება მოვიპოვეთ დოდო დიასამიძისგან. მედეა ვასაძის სატელეფონო ზარი არის ჩემი ჟურნალისტური საქმიანობაში ხელის შეშლა თავისი თანამდებობრივი მდგომარეობის გამოყენებით. ის ცდილობს ჩემს დაშანტაჟება-დაშინებას. ყველაზე ცუდი რამ, რაც ამ ჩანაწერიდან ჩანს, დეპუტატი არ ერიდება კონკრეტული მოქალაქის მიერ მიწერილი წერილის გასაჯაროებას", - აღნიშნა ჯაბა ანანიძემ.

"ახლა მე ვიწყებ შენს წინააღმდეგ მუშაობას, "მიკერძოებული ხარ" "ცოლი გყავს? საეჭვო მიხვრა-მოხვრა გაქვს" "ხვალ დაიკითხები პროკურატურაში", - ეს ის ფრაზებია, რომლითაც ჟურნალისტის თქმით, აჭარის უმაღლესი საბჭოს დეპუტატმა მედეა ვასაძემ მიმართა.

მისივე განცხადებით, საგამოძიებო ფილმი "უმაღლესი კომფორტით" აჭარის უმაღლესი საბჭოს დეპუტატების მიერ გაწეულ ხარჯებსა და საკანონმდებლო ორგანოს საქმიანობის ეფექტურობას ეხებოდა