ნორლანდი- როდესაც ვხედავთ კანდიდატს დასისხლიანებული სახით-ეს არ არის ნამდვილად კარგი ნიშანი

პოლიტიკა - 17:34, 09 Jun, 2014

1396

აშშ-ის ელჩი საქართველოში რიჩარდ ნორლანდი აცხადებს, რომ "როდესაც ვხედავთ კანდიდატს დასისხლიანებული სახით, მოდის ინფორმაცია დაშინების შესახებ ან აგრესია საარჩევნო კომისიის მუშაკის მიმართ, ეს არ არის ნამდვილად კარგი ნიშანი, როგორც საარჩევნო გარემოსთვის, ასევე ზოგადად საქართველოსთვის".

ნორლანდის განცხადებით, იმის თქმა, საარჩევნო გარემო ცუდია ან გაუარესებული ჯერ ადრეა.

"პოლიტიკური თვალსაზრისით თავად პოლიტიკური პარტიების ლიდერები და წევრები უნდა აგზავნიდნენ სიგნალს თავისი მხარდამჭერებისთვის.

რა საკვირველია, ეს არჩევნები არის ის არჩევნები, რომლის მოსაგებადაც იბრძვიან, მაგრამ ამავე დროს ძალადობას, დაშინებას, საარჩევნო კომისიის წევრებზე გარკვეულ ზეწოლას არ აქვს გამართლება. ასეთი გზავნილი უნდა იყოს პოლიტიკური პარტიებისგან, რომ ეს ყველაფერი იყოს შესრულებული. ადრეა იმის თქმა, რომ საარჩევნო გარემო ცუდია ან გაუარესებულია, მაგრამ ამავე დროს, როდესაც ვხედავთ კანდიდატს დასისხლიანებული სახით, მოდის ინფორმაცია დაშინების შესახებ ან აგრესია საარჩენო კომისიის მუშაკის მიმართ, ეს არ არის ნამდვილად კარგი ნიშანი, როგორც თავად საარჩევნო გარემოსთვის, ისე ზოგადად საქართველოსთვის. მნიშვნელოვანია, რომ პოლიტიკურმა ლიდერებმა ზუსტი სიგნალი გაუგზავნონ თავიანთ წევრებს",- განაცხადა რიჩარდ ნორლანდმა.

მისივე თქმით, აღნიშნულთან დაკავშირებითგანცხადებებიც კეთდება. ელჩის განცხადებით, კახა კალაძემ გააკეთა განცხადებს, რომ "ქართული ოცნება" არ ემხრობა ასეთ მიდგომებს და მისივე თქმით, ეს იყო "ქართული ოცნების" წევრების მიმართ გაკეთებული სერიოზული გზავნილი.

"შესაბამისად, შინაგან საქმეთა სამინისტრომაც გააკეთა განცხადება, რომ პოლიციელები არ უნდა ჩაერიონ საარჩევნო პროცესში. არ ვამბობთ ნამდვილად იმას, რომ უარესად არის სიტუაცია, ვიდრე წინა არჩევნებზე იყო, მაგრამ ასეთი ინციდენტები იწვევს შეშფოთებას იმ ადამიანებში, ვისაც აღელვებს საქართველო", - აღნიშნა ნორლანდმა.

ელჩი აშშ-ის საელჩოს მიერ გუშინ გავრცელებულ განცხადებას გამოეხმაურა და აღნიშნა, რომ ისინი იმედოვნებენ, 15 ივნისის არჩევნები იქნება ისეთივე მაღალი სტანდარტის, როგორიც იყო გასული ორი არჩევნები.

"ეს განცხადება ასახავდა იმ მზარდ შეშფოთებას საერთაშორისო თანამეგობრობის წარმომადგენლებში, რომლებიც ეხება იმ რისკს, რომლის წინაშეც შესაძლოა დადგეს საქართველო, თუ არ ექნება დაკმაყოფილებული ის მაღალი სტანდარტები, რომელიც მან დაამკვიდრა ორი უკანასკნელი არჩევნების დროს. საქართველოს მეგობრები საერთაშორისო თანამეგობრობაში, მათ შორის ჩვენც და ის ადამიანებიც, ვინც დიდი შთაბეჭდილების ქვეშ არიან უკანასკნელი ორი არჩევნებით, ვიმედოვნებთ, რომ ამ არჩევნების სტანდარტი არ დადგება საფრთხის ქვეშ და კვლავ მაღალი სტანდარტის არჩევნები ჩატარდება", - აღნიშნა რიჩარდ ნორლანდმა და დასძინა, რომ ამერიკის შეერთებული შტატების, ნიდერლანდებისა და დიდი ბრიტანეთის საელჩოები ითანამშრომლებენ ამ არჩევნებზე და ერთობლივი სადამკვირვებლო მისიით იქნებიან წარმოდგენილნი.