მთავარი პროკურატურა მიხეილ სააკაშვილისთვის მოწმედ დაკითხვის შეთავაზებას ძალაში ტოვებს

პოლიტიკა - 14:47, 09 Jun, 2014

1209

საქართველოს ყოფილ პრეზიდენტ მიხეილ სააკაშვილისთვის მოწმის სახით დაკითხვის შეთავაზება ძალაშია. როგორც "ინტერპრესნიუსს" საქართველოს მთავარ პროკურატურაში განუცხადეს , იმ საქმეებზე, რაზეც სააკაშვილი მოწმედ გამოიძახეს, გამოძიება მისი დაკითხვის გარეშე გრძელდება, თუმცა შეთავაზება, როგორც დისტანციურ, ასევე პროკურატურაში დაკითხვის თაობაზე,კვლავ ძალაში რჩება.

ბადაშვილის უწყებაში არ აკონკრეტებენ, უკვე ცნობილი სისხლის სამართლის საქმეების გარდა, მიმდინარეობს თუ არა სხვა საქმეებზე გამოძიებები, სადაც ყოფილი პრეზიდენტი ფიგურირებს.

მიხეილ სააკაშვილის დაკითხვაზე დაბარების შესახებ საქართველოს პროკურატურამ განცხადება 2014 წლის 22 მარტს გააკეთა. სააკაშვილმა პროკურატურაში მისვლაზე უარი თქვა. ამის შემდეგ, პროკურატურამ მას სკაიპით (დისტანციური) დაკითხვა შესთავაზა, რაზეც სააკაშვილმა ასევე უარი განაცხადა.

პროკურატურამ სააკაშვილი რამდენიმე სისხლის სამართლის საქმეზე გამოძიების ფარგლებში დაიბარა, მათ შორის ალექსანდრე (სანდრო) გირგვლიანისა და ლევან ბუხაიძის მიმართ 2006 წლის 28 იანვარს ჩადენილი დანაშაულისათვის მსჯავრდებული პირების: გ. ალანიას, ალ. ღაჭავას, მ. ბიბილურიძისა და ა. აფციაურის შეწყალება, რომელიც განხორციელდა საქართველოს პრეზიდენტის 2008 წლის 24 ნოემბრის განკარგულებით; ტელეკომპანია ,,იმედში" შეჭრა, დარბევა, უკანონოდ დაუფლება, გარდაცვლილი ბადრი პატარკაციშვილის ოჯახის მიმართ განხორციელებული სხვადასხვა უკანონო ქმედებები, რაც დასრულდა 2011 წლის 6 ივლისს, საქართველოს ხელისუფლებასა და ა. პატარკაციშვილის ოჯახს შორის მემორანდუმის გაფორმებით; 2009-2012 წლებში სახელმწიფო დაცვის სპეციალური სამსახურის კუთვნილი 8 837 461 ლარის გაფლანგვა; პრემიერ-მინისტრ ზურაბ ჟვანიას გარდაცვალებასთან დაკავშირებული გარემოებების დადგენის მიზნით წარმოებულ სისხლის სამართლის საქმე; 2004 წლის ივნისში ტელეკომპანია ,,რუსთავი 2"-ისა და ტელეკომპანია ,,მზე"-ს კანონიერი მესაკუთრეებისათვის წილების იძულებით დათმობის ფაქტი; 2009 წლის 20 მაისს ე.წ. მუხროვანის ამბოხებისათვის ძებნილი პირების, კობა ოთანაძის, ლევან ამირიძისა და გია კრიალაშვილის დაკავების სპეცოპერაციისას, გ.კრიალაშვილის ლიკვიდაციის, ლ.ამირიძის და კ.ოთანაძის დაჭრის ფაქტი; 2012 წლის 24 თებერვალს სახელმწიფოს კუთვნილი შპს "აგრომეტი"-ს (აგრარული უნივერსიტეტის) ქონების გაფლანგვა; 2012 წლის 31 ოქტომბრის პრეზიდენტის განკარგულებით მისი ბიძის, თ.ალასანიასთვის უპირატესობის მინიჭებით, სახელმწიფო ქონების შპს "ბეზეკზე" უკანონოდ პრივატიზების ფაქტი; 2012 წლის თებერვალში აჭარის ავტონომიურ რესპუბლიკაში მოქმედი ტელევიზია "ტვ-25"-ის საარჩევნო პერიოდში გაკონტროლების მიზნით, მისი დამფუძნებლებისათვის 3 მილიონამდე აშშ დოლარის ღირებულების სახელმწიფოს კუთვნილი უძრავი ქონების სიმბოლურ ფასად - 1 ლარად გადაცემის ფაქტი. 2011-2012 წლებში მაღალი თანამდებობის პირების ორგანიზებითა და მონაწილეობით "ქართუ" ბანკის ხელოვნურად გაკოტრების მიზნით, ბანკში იპოთეკით დატვირთული ქონების თვალთმაქცურად გასხვისების გზით გადამალვის ფაქტი.

წყარო: ინტერპრესნიუსი