ოკუპირებული ტერიტორიების გამყოფი ხაზის მიმდებარე ყველა სოფლის გაზიფიცირება იწყება

პოლიტიკა - 15:59, 08 Jun, 2014

2146

ვიცე-პრემიერი, ენერგეტიკის მინისტრი კახა კალაძე და საქართველოს გაზისა და ტრანსპორტირების კომპანიის გენერალური დირექტორი მამუკა კობახიძე, ქარელის მუნიციპალიტეტში ოკუპირებული ტერიტორიების გამყოფ ხაზთან მდებარე სოფელ ქვემო შაქშაქეთში გაზიფიცირების სამუშაოების დაწყებას დაესწრებიან.

როგორც ,,ნიუპოსტს“ სამინისტროდან აცნობეს, პროექტის ფარგლებში ქარელის მუნიციპალიტეტში გაზიფიცირდება ოკუპირებული ტერიტორიების გამყოფ ხაზთან მდებარე 10 სოფელი: ფცა, ქვემო შაქშაქეთი, ავლევი, კნოლევი, ცერონისი, ჭვრინისი, კოდა, გულიკაანთ უბანი, ატოცი და აბანო. სულ გაზიფიცირდება 1520 კომლი. სამუშაოებზე დაიხარჯება 2 მლნ 300 ათას ლარზე მეტი.

სახელმწიფო ბიუჯეტიდან, საქართველოს მასშტაბით ოკუპირებული ტერიტორიების გამყოფ ხაზთან მდებარე სოფლების გაზიფიცირებისთვის, პირველ ეტაპზე გამოიყო 10 მილიონი ლარი. გაზიფიცირების სამუშაოები ჩატარდება გორის, ქარელის, კასპის, ხაშურის და ზუგდიდის მუნიციპალიტეტების 40 სოფელში, სულ გაზიფიცირდება 6 922 კომლი.

სოფლების მოსახლეობას სახლებში ბუნებრივ აირს უფასოდ მიუყვანენ.

გაზიფიცირების სამუშაოებს საქართველოს გაზისა და ტრანსპორტირების კომპანია კონტრაქტორ კომპანიებთან ერთად წლის ბოლომდე დაასრულებს.

პროექტის მეორე ეტპაზე დაგეგმილია გორისა და ზუგდიდის მუნიციპალიტეტებში ოკუპირებული ტერიტორიების გამყოფ ხაზთან მდებარე 18 სოფლის გაზიფიცირება.