თომას ჰამერბერგი საქართველოს პროკურატურის გაუმართავ მუშაობაზე საუბრობს

პოლიტიკა - 17:07, 07 Jun, 2014

2645

ევროკავშირის სპეციალური წარმომადგენელმა სამართლებრივი რეფორმებისა და ადამიანის უფლებების საკითხებში თომას ჰამერბერგმა საქართველოში პროკურატურის მუშაობა შეაფასა და აღნიშნა, რომ აუცილებელია უწყების მუშაობის ხარისხის ამაღლება.

ჰამერბერგმა ხაზი გაუსვა, რომ პროკურატურის გაუმართავ მუშაობას მოწმობს მთავარი პროკურორის რამდენჯერმე შეცვლა. ამის შესახებ თომას ჰამერბერგმა სასტუმრო ,,ქორთიარდ მერიოტში" გამართულ პრესკონფერენციაზე განაცხადა.

"კვლავაც რჩება საჭიროება საქართველოში პროკურატურის მუშაობის გაუმჯობესების, ეს ეხება არა მხოლოდ წარსულთან დაკავშირებულ საჩივრებსა თუ პრეტენზიებს, არამედ, არსებულ პერიოდში წარმოქმნილ გარკვეულ სიტუაციას. უაღრესად მნიშვნელოვანია პროკურატურა და პროკურორის როლი ნებისმიერი მართლმსაჯულების სისტემაში, მათ შორის საქართველოში, თუმცა შეიძლება ჩაითვალოს, რომ ჩვენს ქვეყანაში პროკურატურა მაინცდამაინც არ არის ისე მყარად ჩამოყალიბებული, როგორც სასურველია, რომ ეს იყოს, ამას მოწმობს ის, რომ რამდენჯერმე შეიცვალა მთავარი პროკურორი. მთავრობისადმი ჩემი ერთ-ერთი მთავარი გზავნილი სწორედ ის გახლავთ, რომ აუცილებელია უფრო გაძლიერდეს პროკურატურის მუშაობის ხარისხი", - განაცხადა თომას ჰამერბერგმა.

პროკურატურის მუშაობის ხარვეზებიდან ჰამერბერგმა მაგალითად მოიყვანა 2012 წლის არჩევნების შემდეგ უწყებაში შესული საჩივრები, რომლის განხილვაც არ მომხდარა. ჰამერბერგის თქმით, მნიშვნელოვანია რეაგირება ყველა ასეთ საკითხზე, რაც მისი განმარტებით, გულისმობს არა მხოლოდ საჩივრის მიღებას, ,,არამედ განმარტებას, თუ რის გაკეთებას აპირებს ორგანო, რომ მოახდინოს საჩივარში დაფიქსირებულ ფაქტზე რეაგირება“, - აღნიშნა ჰამერბერგმა.