უწყებათაშორისი კომისია მოუწოდებს პოლიტიკურ პარტიებს თავი შეიკავონ საარჩევნო ადმინისტრაციის საქმიანობაში ჩარევისგან.

კომისიის თავჯდომარის თეა წულუკიანის თქმით, პარტიებმა ასევე თავი უნდა შეიკავონ საკუთარ პოლიტიკურ საქმიანობაში მოქალაქეთა ეთნიკური ნიშნით დაყოფისგან.

„ჩვენ უწყებათაშორისი კომისია მკაცრად ვგმობთ იმ აგრესიას, რომელიც გიგი უგულავამ და “ნაციონალურმა მოძრაობამ” განახორციელა მარნეულში, საარჩევნო ადმინისტრაციის კომისიაში. ეს არის დაუშვებელი. ამას სახელმწიფო არ მოითმენს. ყველა პარტიამ, რომელიც თავის თავს ამის უფლებას მისცემს, კანონის მთელი სიმკაცრით დაისჯება. ამაზე ჩვენც გვქონდა მსჯელობა და შევთანხმდით რეკომენდაციაზე, რომ იმ საგამოძიებო პროცესის პარალელურად, რომელიც გუშინდელ ფაქტთან დაკავშირებით მიმდინარეობს, მოვუწოდებთ 8 პარტიას რომ თავი შეიკავონ საარჩევნო ადმინისტრაციის საქმიანობაში ჩარევისგან. მეორე რეკომენდაცია არის ასევე უმნიშვნელოვანესი ჩვენი ქვეყნისთვის. კომისია გმობს, როდესაც პოლიტიკური პარტია პოლიტიკურ ჭრილში, პოლიტიკური კამპანიის პირობებში და პოლიტიკურ პროცესში მუდმივად აპელირებს მოქალაქეთა ეთნიკურ წარმოშობაზე და ცდილობს, რომ ეთნიკური უმცირესობა უმრავლესობამ გამოიყენოს საკუთარი პოლიტიკური მიზნებისთვის. ჩვენ მოვუწოდებთ ყველა პოლიტიკურ პარტიას, თავი შეიკავონ საკუთარ პოლიტიკურ საქმიანობაში მოქალაქეთა ეთნიკური ნიშნით დაყოფისგან, რადგან ეს არის დამღუპველი ჩვენი ქვეყნისთვის“, - განაცხადა წულუკიანმა.

ამასთან, იუსტიციის მინისტრი ალეკო შალამბერიძის მიერ გაკეთებულ განცხადებას ეხმაურება. თეა წულუკიანი მოუწოდებს, სოფელ კარწახში მოქმედ საკრებულოს წევრს აბრაამ კარაპეტიანს სასწრაფოდ დაუბრუნოს მოსახლეობას ჩამორთმეული პირადობის დამადასტურებელი მოწმობები.

“მინდა, გამოვეხმაურო ბატონი ალეკო შალამბერიძის შემოტანილ ინფორმაციას და როგორც უწყებათაშორისი კომისიის თავმჯდომარე სოფელ კარწახში მოქმედ საკრებულოს წევრს, აბრამ კარაპეტიანს მივმართავ, რომელსაც თურმე სოფლის მაცხოვრებლების თქმით, პირადობის მოწმობები და პასპორტები ჩამოურთმევია და მოვუწოდო მას, შეწყვიტოს ფეოდალიზმი და მოსახლეობას დაუბრუნონ კუთვნილი დოკუმენტები, რადგამ ყველას აქვს უფლება, ხმა მისცეს მას, ვისაც საჭიროდ თვლის“, - განაცხადა წულუკიანმა.