ნიკა მელია მძიმე კაცთან: არა მხოლოდ მერობის კანდიდატი, არამედ ხულიგანიც ვარ...

პოლიტიკა - 17:22, 06 Jun, 2014

3664

„არა მხოლოდ მერობის კანდიდატი, არამედ ხულიგანიც ვარ“ - ამბობს მძიმე კაცთან სტუმრად მყოფი ნიკა მელია და კაფეს გახმაურებულ ინციდენტს იხსენებს, რომელსაც გაგრძელება რუსთაველზე მოჰყვა და რის გამოც ხულიგნობის მუხლია მასზე აღძრული. კაფეს ფაქტს კი ასე ხსნის: „ნასვამ მდგომარეობაში მყოფი რამდენიმე ადამიანი არ იყო კმაყოფილი წარსულით და შეეცადა, დაენახებია აწმყოში, თუ რა ცუდი იყო წარსული“.

მერობის ხულიგანი კანდიდატის თქმით წელს არაორდინალური არჩევნები იქნება, ისეთი როგორიც ჯერ არ ჩატარებულა თბილისში. „ყველაფერს ვაკეთებ იმისათვის, რომ გავიმარჯვო“, - ამბობს ნიკა მელია და მძიმე კაცთან მთავარ კონკურენტზე დავით ნარმანიაზე საუბრობს.

ნიკა მელია: „ჩემი მთავარი კოკურენტი კოალიცია ქართული ოცნებაა. ქართული ოცნების კანდიდატს ორჯერ შევხვდი, ერთხელ დებატებში, მეორედ ღონისძიებაზე. ვფიქრობ, რომ პატიოსანი ადამიანია. ასეთი შთაბეჭდილება დამრჩა. ადამიანი, რომელიც ნაკლებად გააკეთებს ბოროტებას, მაგრამ ამავე დროს დარწმუნებული ვარ, რომ დამოუკიდებლობის ხარისხი აქვს ძალიან დაბალი, ამიტომ ვფიქრობ რომ ამ არჩევნებში მარტო იმიტომ კი არ უნდა გავიმარჯვო, რომ მე მინდა გამარჯვება, ჩემი გამარჯვებით მინდა მასაც ხელი შევუწყო, რომ არ გაიმარჯვოს და ამით რაღაცნაირად დავეხმარო. დედაქალაქის მერი უნდა იყოს ის ადამიანი, რომელიც აბსოლუტურად იქნება დამოუკიდებელი და დისტანცირებული ვიწრო პარტიული ინტერესებიდან“.