საქართველოს საგარეო საქმეთა მინისტრი გაერო–ში საქართველოს მხარდამჭერი რეზოლუციის მიღებას „დიდ გამარჯვებად“ აფასებს

მაია ფანჯიკიძის თქმით, გაერო–ს წევრი ქვეყნების მხრიდან ამ რეზოლუციამ ყველა მხრივ დადებითი შედეგი აჩვენა.

„ გვაქვს ძალიან დიდი გამარჯვება. 69 მომხრე და მხოლოდ 13 წინააღმდეგი, 79–მა თავი შეიკავა. შარშან გვქონდა 62 დადებითი და 16 უარყოფითი ხმა, რაც იმას ნიშნავს, რომ შვიდით გაიზარდა მომხრეთა რაოდენობა და სამით შემცირდა მოწინააღმდეგეების რიცხვი. ასევე შემცირებულია მათი რიცხვი, ვინც თავი შეიკავა. შარშან ეს იყო 84. ეს ყველაფერი იმას ნიშნავს, რომ ლტოლვილთა და იძულებით გადაადგილებულ პირთა დაბრუნებას მათი უფლებების აღდგენას, ასევე მათი საკუთრების უფლების დადგენას სულ უფრო მეტი სახელმწიფო უჭერს მხარს.მინდა, მადლობა გადავუხადო ყველა იმ ქვეყანას, რომელმაც რეზოლუციას მხარი დაუჭირა, აგრეთვე დიდი მადლობა იმ თანამშრომლებს, რომლებმაც დაუღალავად იშრომეს იმისთვის, რომ ამ შედეგისთვის მიგვეღწია“- განაცხადა მაია ფანჯიკიძემ.

საქართველოს მხარდამჭერი რეზოლუცია გაერო-მ 69 ხმით 13-ის წინააღმდეგ მიიღო.