შერიგებისა და სამოქალაქო თანასწორობის საკითხებში სახელმწიფო მინისტრი პაატა ზაქარეიშვილი მიიჩნევს, რომ ალექსანდრე ანქვაბმა დე-ფაქტო აფხაზეთის პრეზიდენტობიდან გადაგომით სწორი გადაწყვეტილება მიიღო. როგორც ზაქარეიშვილმა გადაცემა „სუბიექტურ აზრში“ სტუმრობისას განაცხადა, ანქვაბმა ამ გადაწყვეტილებით ხალხს სისხლისღვრა ააცილა.

„ანქვაბი თუ ასე სწრაფად გადადგებოდა არ მეგონა. მეგონა, რომ ერთი ორი დღე მაინც იბრძოლებდა. რამოდენიმე ახსნა შეიძლება ჰქონდეს ამას, შეიძლება სისხლის ღვრა არ უნდოდა და ჰქონდა ინფორმაცია, რომ მოწინააღმდეგე მხარე სისხლის დამღვრელი იყო. ანქვაბი გამოირჩევა გონივრულობით და არის გაწონასწორებული. რაც მთავარია, ის ყოველთვის წინააღმდეგი იყო სისხლის ღვრის. კრიტიკულ სიტუაციებში მისი ამოცანა იყო ხალხის გადარჩენა და არაერთხელ გადაურჩენია ქართველი ხალიც. მეორე რის გამოც ეს გადაწყვეტილება შეიძლება მიეღო, მიხვდა, რომ თამაში წაგებული იყო. თუმცა ანქვაბის წასვლა არ ნიშნავს, რომ მისი გუნდიც წავა. გაერთიანებული ოპოზიცია ძლიერია ანქვაბზე, მაგრამ დაშლილი ოპოზიცია ანქვაბის ძალაზე ძლიერი არაა. თუ ანქვაბის გუნდიდან ვინმე იყრის კენჭს 24 აგვისტოს არჩევნებში ალბათ მისი წასვლა სწორი გადაწყვეტილება იყო. არჩევნებამდე დრო საკმარისია იმისთვის, რომ მოსახლეობას ანქვაბი მოენატროს“, - განაცხადა ზაქარეიშვილმა.