„დღევანდელი ხელისუფლება პრობლემებს არ გაურბის, პირიქით, პირადად მას ეს ათჯერ უფრო მეტ ენერგიას აძლევს“, - ამის შესახებ პრემიერ-მინისტრმა რუსთავში მერობის კანდიდატების წარდგენისას განაცხადა.

მისი თქმით, მთავრობას წინა ხელისუფლებისგან მძიმე მემკვიდრეობა ერგო, თუმცა ამის მიუხედავად ის პრობლემებს არ გაურბის.

“დღეს ქვეყანაში კვლავ უამრავი წლების განმავლობაში დაგროვილი პრობლემაა. მე რეგიონებში ბევრს ვმოგზაურობ. 21-ე საუკუნეში ყველგან ერთი და იგივე პრობლემა დამხვდა, ესაა - საბაზისო პირობების არქონა, უგზოობა, უგაზობა, უწყლოობა და რაც ყველაზე მეტად გვაწუხებს - ეს არის უმუშევრობა. კიდვე ერთხელ ვუბრუნდებით იმას, რომ წარმოება არ არსებობს. სოფელი არის დაცლილი და გაღარიბებული. სოფლის მეურნეობა იყო განადგურებული. ჩვენ მძიმე მემკვიდრეობა გვერგო, მაგრამ ჩვენ პრობლემებს არ გავურბივართ, პირიქით, ეს უფრო გვაძლიერებს და პირადად მე ეს მაძლევს ათჯერ უფრო მეტ ენერგიას, რომ ერთხელ და სამუდამოდ ქვეყანაში გადავწყვიტოთ და ხალხს მივცეთ რეალური სარგებელი. ჩვენ ვიცით რაზე ვსაუბრობთ და როგორ მოვაგვაროთ ეს პრობლემები, თანმიმდევრულად და გონივრულად. წინა ხელისუფლების მსგავსად ჩვენ ვირტუალურ სურათს არ ვქმნით, თითქოს ქვეყანაში აღმშენებლობის ეპოქა იდგა და ყველა ადამიანი ბედნიერი იყო, თავი ახლაც ამით მოაქვთ. რეალური სურათი რომ სულ სხვა იყო, მემგონი, ამაზე არ ვდავობთ. ჩვენ ძალიან კარგად ვიცით ყველაფერი, ხალხი ბრძენია. ჩვენი ხელისუფლება ხალხს არ ვატყუებთ და არც არასდროს წამოვაძახებთ იმას, რასაც ვაკეთებთ, ვინაიდან ჩვენ მიგვაჩნია, რომ ეს ჩვენი ვალდებულებაა. ჩვენ აგვირჩიეთ იმისთვის, რომ თქვენ გემსახუროთ და არა პირიქით და ეს ასეც იქნება, ვიდრე ჩვენ ხელისუფლებაში ვიქნებით”, - განაცხადა ღარიბაშვილმა.