საქართველის პირველი პრეზიდენტის ზვიად გამსახურდიას შვილი ცოტნე გამსხურდია სოციალურ ქსელში ირაკლი ღარიბაშვილისა და ჟურნალისტების შეხვედრას ეხმაურება. გამსახურდია გუშინ გამართულ პრესკონფერენციაზე აღნიშნავს, რომ პრესკონფერენცია ღია, თავისუფალ ფორმატში ახალი ფენომენია ქართულ პოლიტიკურ რეალობაში:

„მიუხედავად მთელ რიგ საკითხებში ხელისუფლებისადმი კრიტიკული დამოკიდებულებისა, უნდა ვთქვა: პრემიერის პრესკონფერენცია ღია, თავისუფალ ფორმატში ახალი ფენომენია ქართულ პოლიტიკურ რეალობაში. აღარ არიან შერჩეული ჟურნალისტები განაწილებული, დაზეპირებული როლებით და აღარც მედიას ეშინია უზურპაციის და დახურვის უხერხული კითხვებისათვის.

ამგვარი ღონისძიებების ფორმატი და მიზანი სწორედ მთავრობის ანგარიშვალდებულების გაზრდაა საზოგადოების მიმართ. აქ მინდა ვუთხრა ბატონ პრემიერს, რომ ხსენებული ანგარიშვალდებულება კითხვის არამხოლოდ მოსმენას, არამედ მასზე ამომწურავი პასუხის გაცემას გულისხმობს; ან გაურკვეველი საკითხის შესწავლის ვალდებულების აღებას და შესრულებას.

ასევე ვფიქრობ, დროა ბოლობოლო დამთავრდეს ნაცმოძრაობის ოდიოზურ, დისკრედიტებულ ფრთაზე სწორება. თქვენ ხალხს იმიტომ არ აურჩევიხართ, რომ საზომად მუდმივად მერაბიშვილი და ახალაია მოგყავდეთ.

მესამეც, კითხვების დასმა ბოროტი განწყობის ნიშანი არ არის და ნეგატიურ რეაქციას არ უნდა იწვევდეს. მათზე პასუხის გაცემა თქვენი ვალდებულებაა!“, - წერს გამსახურდია.