გაფარჩაკებული პროკურატურა ხვდება, რომ შამათავას განაჩენი გამამართლებელი იქნება

გაფარჩაკებული პროკურატურა ხვდება, რომ შამათავას განაჩენი გამამართლებელი იქნება - ანი ნადარეიშვილი

სოც.მედია - 12:24, 05 Jun, 2014

2708

თავდაცვის ყოფილი მინისტრის მეუღლე ანი ნადარეიშვილი, შს სამინისტროს განცხადებას სოციალური ქსელის მეშვეობით ეხმაურება.

"უგუნური და პანიკაში მყოფი ხელისუფლების იდიოტური სქემა, თუ როგორ გაუხანგრძლივონ გმირებს პატიმრობა, რომელსაც უკვე პატარა ბავშვიც კი ხვდება რომ მარაზმია.

რომა შამათავა არის საქართველოს გმირი, ამას ყოველთვის ხმამაღლა ვიტყვი, მისი თავისუფლებაზე ყოფნა რბილად რომ ვთქვათ ძალიან არ აწყობს რუსეთს, მითუმეტეს აფხაზეთში დღეს მიმდინარე მოვლენების გამო, და სწორედ მათი დავალებით არის გამოკეტილი ციხეში. ყველას გახსოვთ ალბათ გენერალ გოგი თათუხაშვილის განცხადება, რომ მისი შვილის შემდეგ რომას ლიკვიდაცია მოხდება.

რომას წინასწარი პატიმრობის ვადა 21 ივლისს ეწურება, ისე როგორც ბაჩოს 26 ივლისს. სასამართლოს წინაშე გაფარჩაკებული პროკურატურა ხვდება რომ განაჩენი გამამართლებელი იქნება, სწორედ ამიტომ დგება რომას გარეთ გამოსვლის საშიშროება და სწორედ ამიტომ დასჭირდათ იმ სქემის გამოყენება, რომელსაც აგერ უკვე თითქმის ორი წელია ბაჩოს მიმართ იყენებენ - ყოველი გამამართლებელი განაჩენის წინ ახალი ცრუ ბრალდება პატიმრობის კიდევ 9 თვით გასახანგრძლივებლად.

P.S. ხო, და კიდევ, ლეგენდების შეთხზვას, ჯერ ადამიანის გვამი იპოვონ და მერე დასდონ ბრალი მეორე ადამიანს მის მკვლელობაში. უგვამო მკვლელობა არ გამიგია მე",- წერს ანი ნადარეიშვილი "ფეისბუქის" საკუთარ გვერდზე.

შსს-ს ინფორმაციით, 2008 წლის 21 მაისს საპარლამენტო არჩევნების დღეს, ხურჩაში ორი სამგზავრო ავტობუსის აფეთქება რომან შამათავას ორგანიზებით მოხდა. მასალების მიხედვით, ააფეთქეს ის სატრანსპორტო საშუალებები, რომელსაც სოფელ ნაბაკევის მოსახლეობა არჩევნებში მონაწილეობისთვის ზუგდიდში უნდა გადაეყვანა. აფეთქებამ გამოიწვია მოსახლეობის დაპანიკება და დაიჭრა ერთ-ერთი ადგილობრივი. სწორედ აღნიშნულთან დაკავშირებით, რომან შამათავას და მალხაზ მურღულიას ბრალი წარედგინათ სისხლის სამართლის კოდექსის 323-ე მუხლის მე-2 და მე-3 ნაწილებით გათვალისწინებული დანაშაულის ნიშნებით, რაც სასჯელის სახით ითვალისწინებს 15-დან 20 წლამდე ან უვადო თავისუფლების აღკვეთას.