"ნატო-საქართველოს კომისიის შეხვედრაზე არ განგვიხილავს საქართველოს ალიანსში გაწევრიანების გრაფიკი, ეს საკითხი არ ყოფილა ამ შეხვედრის მიზანი" , - ამის შესახებ ნატოს გენერალურმა მდივანმა, ანდერს ფოგ რასმუსენმა ბრიუსელში, თავდაცვის მინისტრების შეხვედრის შემდეგ გამართულ პრესკონფერენციაზე განაცხადა.

"ჩვენ აღვნიშნეთ ის მნიშვნელოვანი პროგრესი, რომელიც თავდაცვის სფეროში და ქართულ საზოგადოებაში კიდევ უფრო მეტ რეფორმებს უკავშირდება. დღევანდელ შეხვედრაზე ეს პროგრესი აღიარებული იყო. მაგრამ, ჩვენ ასევე გვესმის, რომ ჯერაც ბევრია გასაკეთებელი", - განაცხადა ნატო-ს გენერალურმა მდივანმა.

მისი თქმით, შემდგომი ნაბიჯების შესახებ გადაწყვეტილება განხილული იქნება ნატო-ს წევრი ქვეყნების საგარეო საქმეთა მინისტრების შეხვედრაზე.

"საგარეო საქმეთა მინისტრები განხილავენ მოხსენებებს კანდიდატი ქვეყნების, მათ შორის საქართველოს პროგრესთან დაკავშირებით. მინისტრები მიიღებენ გადაწყვეტილებას, როგორ მივუდგეთ ღია კარის პოლიტიკას სამიტზე", - განაცხადა ანდერს ფოგ რასმუსენმა.

რასმუსენის თქმით, საქართველო ნატო-ს მნიშვნელოვანი პარტნიორი და არაწევრ ქვეყნებს შორის ერთ-ერთი უდიდესი კონტრიბუტორია ავღანეთის მისიაში. მისივე თქმით, ნატო მხარს უჭერს საქართველოს და უკრაინის ტერიტორიულ მთლიანობასა და სუვერენიტეტს.

"ქართველმა ხალხმა ევროკავშირსა და ნატო-ს წევრობისკენ მიმავალი გზა აირჩია. ეს მათი სუვერენული არჩევანია. ჩვენ პატივს ვცემთ ამას. ამ არჩევანს პატივი უნდა სცეს რუსეთმაც", - განაცხადა რასმუსენმა.