თეა წულუკიანი საჯარო მოხელეებს მიმართავს

პოლიტიკა - 21:28, 04 Jun, 2014

1193

იუსტიციის მინისტრი თეა წულუკიანი საჯარო მოხელეებს მოუწოდებს, საარჩევნო აგიტაციაში არ ჩაებან. მინისტრის განცხადებით, უწყებათაშორისმა კომისიამ მათ მოუწოდა, რომ ადმინისტრაციული რესურსი პოლიტიკურ პროცესებს უნდა გაემიჯნოს.
„საჯარო მოხელე სამუშაო საათებში ვერ გამოიყენებს იმ რესურსს, რასაც ჰქვია სამუშაო ადგილი, სამსახურებრივი მანქანა, ხელფასი, მდივანი, მძღოლი. აი, ამგვარ რესურსებს, რომელიც არის მიბმული მის თანამდებობასთან, ვერ გამოიყენებს იმ პარტიის სასარგებლოდ, რომელსაც ის მხარს უჭერს და თუ ის ამას აკეთებს, ამგვარი საჯარო მოხელე არღვევს კანონს, არღვევს საარჩევნო კოდექსს. მე კიდევ ერთხელ მივმართავ საჯარო მოხელეებს, რომ ის დრო, რაც არის დარჩენილი, მაქსიმალურად გაემიჯნონ პოლიტიკურ პროცესს სამუშაო საათებში. თუ არიან კანდიდატები, თუ არიან პოლიტიკურ პროცესში ღიად ჩართული, კეთილი ინებონ და როგორც ამას ითვალისწინებს შრომის კოდექსი, შეწყვიტონ დროებით სამუშაო ურთიერთობები დამსაქმებლებთან.
იუსტიციის სამინისტროს სიტემაში არის, რამდენიმე ადამიანი საარჩევნო პროცესში ჩართული და ისინი არიან გაშვებული უხელფასო შვებულებაში, რათა მათ კანდიდატობის, თუ სხვა პოლიტიკური აქტივობების დროს ჰქონდეთ საკმარისი დრო, რომ იმუშაონ პარტიისთვის და არა როგორც იუსტიციის სამინისტროს თანამშრომლებმა.
უწყებათაშორისმა კომისიამ ძალიან ბევრჯერ მიმართა საჯარო მოხელეებს, როგორც ცენტრალურ ხელისუფლებაში, ისე ადგილებზე, რომ გაემიჯნონ პოლიტიკურ პროცესებს“, - განაცხადა თეა წულუკიანმა.