თავდაცვის მინისტრი ირაკლი ალასანია აშშ-ის პრეზიდენტის ბარაკ ობამას იმ განცხადებას გამოეხმაურა, სადაც ობამა აღმოსავლეთ ევროპის ქვეყნებისთვის სამხედრო მხარდაჭერის გაძლიერებაზე საუბრობს.

ალასანიას განცხადებით, დეკლარაციული ხასიათის განცხადებებიდან აქცენტი კონკრეტულად საქართველოს ტერიტორიაზე თავდაცვითი შესაძლებლობების გაზრდაზე გადადის.

“ნატო-საქართველოს კომისიის შემდეგ ერთადერთი დასკვნის გაკეთება შეგვიძლია, რომ სამიტის შედეგ იმ შემოთავაზებებით, რომელიც აქვს ნატო-ს და თავად პრეზიდენტ ობამას, საქართველო იქნება უფრო დაცული. აქ საუბარია კონკრეტულად საქართველოსთვის თავდაცვითი შეიარაღებისა და ჩვენი თავდაცვითი შესაძლებლობების გაძლიერებაზე. როგორც იქნება ასახული პროგრესი ჩვენი ინტეგრაციისა სამიტის დეკლარაციაში, ამის პარალელურად გაძლიერებული იქნება ჩვენი ქვეყნის თავდაცვისუნარიანობა. ჩემი აზრით, ეს იქნება ისტორიული მომენტი ჩვენი ქვეყნის ნატო-სთან ურთიერთობაში, რომ დეკლარაციული ხასიათის განცხადებებიდან მეტი აქცენტი გადავა კონკრეტულად საქართველოში, ჩვენს ტერიტორიაზე თავდაცვითი შესაძლებლობების გაზრდაზე. ეს იქნება ძალიან მნიშვნელოვანი ჩვენი ხალხისთვის, საზოგადოებისა და ჩვენი ჯარისთვის, რომელიც პრაქტიკულად სრულად თავსებადია ნატო-სთან და ეს ნატო-საქართველოს კომისიის სხდომაზე ყველა გამომსვლელმა აღნიშნა და რაც მნიშვნელოვანია, ჩვენ გვექნება შემაკავებელი ფუნქცია”, - განაცხადა ირაკლი ალასანიამ.