საპარლამენტო უმრავლესობის ერეერეი ლიდერის, „რესპუბლიკური პარტიის“ წევრის, თინა ხიდაშელის განცხადებას აფხაზეეში განვითარებულ მოვლენებთან დაკავშირებით სამხედრო ექსპერტი გიორგი თავდგირიძე ეხმაურება.

ხიდაშელის განცხადებით, აფხაზეთში განვითარებული მოვლენების უმსხვერპლოდ წარმართვაში საქართველოს ხელისუფლებამ დიდი როლი შეასრულა, აფხაზეთის ანექსია რუსეთის მხრიდან კი დროის მოკლე მონაკვეთში შესაძლოა ნიშნავდეს იმას, რომ აფხაზეთი, როგორც ასეთი, აღარ იქნება.

გიორგი თავდგირიძე „ალიასთან“ საუბრისას ამბობს, რომ „რესპუბლიკელების“ ასეთი გამონათქვამები შიდა მოხმარებისთვის არის გათვლილი :

„მე პირადად ობამასა და მერკელის განცხადებებს უფრო ვენდობი ვიდრე ლევან ბერძენიშვილისა და თინა ხიდაშელის განცხადებებს. ეს ადამიანები ამ ყველაფერს არა მხოლოდ არჩევნებისთვის იყენებენ, არამედ, ცდილობენ ამგვარი თაღლითობით საკუთარი უნიათობა გადაფარონ. აქედან გამომდინარე მათ უჩნდებათ უტოპიური იდეები ნათელი მომავლის შესახებ - კომუნიზმი, მაპი და ა.შ.

ესენი ცდილობენ და გაუვათ თუ არა ეს ჩვენზეა დამოკიდებული. ჩვენი მიზანი უნდა იყოს დასავლური ტიპის სახელმწიფოს შექმნა და მეტი არაფერი.

ხელისუფლებაში ბევრია ისეთი ადამიანი, რომელიც არა მხოლოდ რუსეთს მიეყიდება, არამედ ტანზანიასაც და მეორეც - არიან ისეთი ადამიანები, რომლებიც ძალაუფლების შენარჩუნების მიზნით რუსეთსაც კი დაეტაკებიან. ამ მხრივ აქტიურობით კოალიციაში „რესპუბლიკელები“ და ირაკლი ალასანიას გუნდი გამოირჩევიან. როდესაც შენ ვიღაცას მოყავხარ ხელისუფლებაში და ხალხს არ აურჩევიხარ, ძალაუფლების შესანარჩუნებლად თაღლითობის მეტი არაფერი დაგრჩენია.

თავმოყვარე პოლიტიკოსები ასეთ განცხადებას არ გააკეთებენ, თუმცა, რა დაპირისპირებაც საპარლამენტო უმრავლესობაშია, ზოგიერთებს აიძულებს იყვნენ აქტიურები და იმას აღარ უკვირდებიან, რა სისულელეებს ლაპარაკობენ. ახლა „რესპუბლიკელებმა“ პაატა ზაქარეიშვილის სამინისტროს არსებობა რაღაცნაირად ხომ უნდა გაამართლონ? ფაქტობრივად, ეს კაცი უსაქმურად არის დარჩენილი. კოალიციაში სიტუაცია ძალიან დაძაბულია და ჩვენ არჩევნების შემდეგ ვნახავთ, რა ამბები მოჰყვება ამ ყველაფერს“, – აცხადებს თავდგირიძე.