საქართველოს პრემიერ-მინისტრისა და ჟურნალისტების შეხვედრას „ერთიანი ნაციონალური მოძრაობა“ ეხმაურება.

გოკა გაბაშვილის განცხადებით საქართველოს „აბსოლუტურად არაადეკვატური მთავრობა“ ჰყავს:

„საქართველოს ჰყავს აბსოლუტურად არაადეკვატური მთავრობა, რომელიც აბსოლუტურად არის მოწყვეტილი რეალობას და რომლის გამოფხიზლების ერთადერთი შანსი ჩვენი აზრით არის 15 ივნისს ხალხმა თვალი აახელინოს ამ მთავრობას, რომელიც მართლა არის რეალური და რომელიც მართლა არსებობს, სხვა შემთხვევაში ეს მთავრობა თვლის, რომ დაპირებები შეასრულა, ხალხი დასაქმებულია, ასობით ქარხანა შეიქმნა, იქ ადამაინები მუშაობენ და იქ ყველაფერი კარგად არის“, - განაცხადა გოკა გაბაშვილმა.

აკაკი მინაშვილის განცხადებით, კი დღეს საზოგადოებამ „უსუსური, უუნარო და ექსტრემალურად თვითკმაყოფილი პრემიერ-მინისტრი იხილა“:

„დღეს ჩვენ კიდევ ერთხელ ვიხილეთ უსუსრი, უუნარო, ექსტრემალურად თვითკმაყოფილი ადამიანი, რომელიც ფიქრობს, რომ ყველა პირობა შეასრულა. პრესკონფერენციის დიდი ნაწილი მან მიუძღვნა კვლავ „ნაციონალურ მოძრაობას“, ასევე დიდი ნაწილი მიუძღვნა მედიას და კარგად გამოჩნდა მისი განწყობა, რომ მას არ სურს ქვეყანაში არსებობდეს რეალური ოპოზიცია და რეალური მედია, რომელიც ანგარიშვალდებულს ხდის საქართველოს მთავრობას“, - აღნიშნა აკო მინაშვილმა.

უმცირესობის კიდევ ერთი დეპუტატის შეფასებით, საქართველოს პრემიერ-მინისტრი სრულიად „სხვა რეალობაშია“:

„საქართველოს პრემიერ-მინისტრი არის არაადეკვატური და არის სხვა რეალობაში, აფხაზეთთან მიმართებაში მან ამ უპასუხისმგებლო განცხადებით ფაქტობრივად ბედის ანაბარა მიატოვა გალის რაიონში დარჩენილი ეთნიკური ქართველები, რომლებიც ახლა არიან განსაკუთრებული წნეხის ქვეშ“, - განაცხადა კანდელაკმა.

გივი თარგამაძის შეფასებით კი ირაკლი ღარიბაშვილმა პოლიციური სისტემის სრული უნიათობა აღიარა:

„მან პრაქტიკულად აღიარა პოლიციური სისტემის სრული უნიათობა. ის, რაც ხდება დღეს ყოველდღიურად ის ტოტალური შემოტევა კრიმინალის ეს არის სწორედ ღარიბაშვილის პირად პასუხისმგებლობაზე“, - განაცხადა თარგამაძემ.