პრემიერ-მინისტრმა ირაკლი ღარიბაშვილმა დღეს გამართულ პრესკონფერენციაზე რამდენჯერმე ახსენა ყოფილი პრემიერი ბიძინა ივანიშვილი.

ექსპერტ კახი კახიშვილის თქმით, ის რომ კოალიცია დღეს ხელისუფლებაშია ივანიშილის დამსახურებაა და მისი ხსენება პრემიერის პრესკონფერენციაზე გასაკვირი არ არის.

როგორც „ნიუპოსტთან“ საუბარში კახიშვილმა განაცხადა, აღნიშნული ფაქტი არ ნიშნავს, რომ ბიძინა ივანიშვილი ირაკლი ღარიბაშვილს აკონტროლებს და პრემიერი მისი ზეწოლის ქვეშ არის.

„რეალურად ის ფაქტი, რომ ირაკლი ღარიბაშვილი პრემიერ-მინისტრია და კოალიცია ხელისუფლებაშია, ბიძინა ივანიშვილი დამსახურებაა. როდესაც მათ მიეცემათ საშუალება შეახსენონ საზოგადოებას და ხაზი გაუსვან, რომ გრძნობენ ვალდებულებას ყოფილი პრემიერის მიმართ, ამას აკეთებენ. თუმცა მისი ხსენება არ ხდება მხოლოდ მადლიერების გამო. როგორც გახსოვთ, ივანიშვილმა წასვლის შემდეგ განაცხადა, რომ დატოვებს გუნდს, რომელიც მის საქმეს გააკეთებს. აქედან გამომდინარე, ხაზგასმა კეთდება, რომ ბიძინა ივანიშვილის გაკეთებული საქმეები დღეს გრძელდება. კიდევ ერთხელ ვამბობ, ისინი გამოხატავენ პირველ რიგში მადლიერების გრძნობას და მეორეს მხრივ იმას, რომ ხვალ და ზეგ ბიძინა ივანიშვილმა, რომ ვინმე აითვალწუნოს, ამის შემდეგ შესაძლოა კონკრეტული პირის კარიერას ხაზი გაესვას. ხალხი ამ კოალიციის მიმართ ბიძინა ივანიშვილის მიმართ ავანსად არის განწყობილი. ღარიბაშვილი ყველაზე დაახლოებული პირია ივანიშვილთან და გასაკვირიც არ არის, რომ ის ყოველთვის ივანიშვილს ახსენებს“, - განაცხადა კახიშვილმა.

პრემიერმა დღეს ბიძინა ივანიშვილი პრესკონფერენციაზე რამდენჯერმე ახსენა.

"როგორ ფიქრობთ, ბატონმა ბიძინამ იმიტომ დაალაგა ქვეყანაში სიტუაცია, რომ ვიღაცამ რაღაც არიოს? როგორ ფიქრობთ, ვიღაცეები ფიქრობენ ამას და იგივე ბატონ ბიძინას და მე არ გვაქვს ამაზე ნაფიქრი?" - განაცხადა პრემიერმა.