14 წლის გოგონას მშობლები გამოძიებაში დამოუკიდებელი ექსპერტის ჩართვას ითხოვენ

პოლიტიკა - 14:50, 04 Jun, 2014

3786

გორში გუშინ, საღამოს საათებში, ქალაქის ცენტრში ცხრა სართულიან კორპუსთან, უგონო მდგომარეობაში ნაპოვნი 14 წლის გოგონას სიცოცხლეს კვლავ საფრთხე ემუქრება.

აღნიშნულის შესახებ, როგორც "ნიუპოსტს" გორმედ-დან დაშავებულის მკურნალმა ექიმმა აცნობა, გოგონას მდგომარეობა კვლავ მძიმეა და მისი გადაყვანა თბილისში იაშვილის სახელობის კლინიკაშია დაგეგმილი.

"დაახლოვებით 11 საათზე სასწრაფო სამედიცინო დახმარების მიერ შემოყვანილი იქნა ავადმყოფი, ახალგაზრდა გოგონა. ჩაუტარდა გამოკვლევები და დადგინდა მრავლობითი ტრავმული დაზიანებები. გადაყვანილია მართვით სუნთქვაზე, ამჟამად ავადმყოფის მდგომარეობა რჩება არასტაბილური. ჰერმოდინამიკა არის არასტაბილური. მდგომარეობა არის უკიდურესად მძიმე, თანხმდება პაციენტის გადაყვანა იაშვილის კლინიკაში", - აცხადებს ექიმი მამუკა გუმბერიძე.

ამ დრომდე გორმედის მიმდებარე ტერიტორიაზე შეკრებილები არიან გოგონას ახლობლები და ოჯახის წევრები. არასრულწლოვანის დედა მომხდარის დროულად და ობიექტურ გამოძიებას მოითხოვს, იგი საქმეში დამოუკიდებელი ექსპერტის ჩართვის აუცილებლობაზე საუბრობს. "ბავშვი სახლიდან გასულია ცხრიდან ათ საათამდე, და ნაპოვნია კორპუსის დაბლა. მიყავთ სხვა კუთხით ვითომ ეს არის თვითმკვლელობა მაგრამ, ბავშვს ისეთი დაზიანებები აქვს, რომ თვითმკვლელობა არ იქნება. მე კატეგორიულად წინააღმდეგი ვარ, რომ მაგ მხრივ წავიდეს გამოძიება. ბავშვი არის გადმოგდებული. მე ვითხოვ დამოუკიდებელ ექსპერტს, რადგან ობიექტური გამოძიება ჩატარდეს. ჩემთვის ცნობილია, რომ შსს-მ უკვე დაიწყო გამოძიება თვითმკვლელობის მიზნით, მე გუშინ გავაფრთხილე, რომ ამ მიზნით არ წასულიყო. მაგ კორპუსში არც მეგობრები ჰყავს ბავშვს და არც არავინ ნაცნობი, სავარაუდოდ შეხვედრის ადგილი იყო მანდ", - ამბობს არასრულწლოვანის დედა "ნიუპოსტთან" საუბრისას. 14 წლის გოგონა გორში 9 სართულიანი კორპუსის სადარბაზოსთან გამვლელებმა შემთხვევით, უგონო მდგომარეობაში 22 საათსა და 40 წუთზე იპოვეს.

გიორგი ახალკაცი "ნიუპოსტი" გორი