ალექსი პეტრიაშვილი უკრაინაში გაემგზავრა

პოლიტიკა - 10:38, 04 Jun, 2014

681

ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი 4-5 ივნისს დაგეგმილი საერთაშორისო კონფერენციის მუშაობაში მიიღებს მონაწილეობას.

კონფერენციაზე „DCFTA და არა მარტო - როგორ შეიძლება ევროკავშირმა ხელი შეუწყოს აღმოსავლეთ პარტნიორობის ქვეყნების განვითრებასა და კეთილდღეობას“, რომელიც სტოქჰოლმის ინსტიტუტის გარდამავალი ეკონომიკებისა და კიევის ეკონომიკის სკოლის ორგანიზებით იმართება, ევროკავშირთან ღრმა და ყოვლისმომცველი სავაჭრო სივრცის შესახებ შეთანხმების მნიშვნელობასა და “აღმოსავლეთ პარტნიორობის” მონაწილე ქვეყნებისთვის შეთანხმების ძალაში შესვლის შემდეგ სავარაუდო ეკონომიკურ სარგებელზე იმსჯელებენ.
ვიზიტის ფარგლებში ასევე დაგეგმილია სახელმწიფო მინისტრის ორმხრივი შეხვედრები უკრაინის საგარეო საქმეთა მინისტრთან ანდრეი დეშიცასთან, სახელმწიფო მინისტრთან ევროპულ საკითხებში ოსტაპ სემერიაკთან და პარლამენტის ვიცე-სპიკერთან რუსლან კოშულინსკისთან.
“ძალიან მნიშვნელოვანია, რომ ეს ვიზიტი იმართება უკრაინაში ჩატარებული საპრეზიდენტო არჩევნების შემდეგ. მექნება შესაძლებლობა, სიტყვით გამოვიდე და ვისაუბრო ასოცირებისა და თავისუფალი ვაჭრობის შეთანხმების მნიშვნელობაზე, საქართველოს წინაშე არსებულ გამოწვევებსა და შესაძლებლობებზე. ეს იქნება სერიოზული მხარდაჭერა უკრაინელი ხალხისადმი და უკრაინის ახლადარჩეული პრეზიდენტისა და მისი ევროპული კურსისადმი“, - განაცხადა ალექსი პეტრიაშვილმა.