„ბარაკ ობამას განცხადება ძალიან მნიშვნელოვანი გზავნილია“, - ასე გამოეხმაურა ევრატლანტიკურ სტრუქტურებში ინტეგრაციის საკითხებში სახელმწიფო მინისტრი აშშ-ს პრეზიდენტის მიერ გაჟღერებულ ინიციატივას აღმოსავლეთ ევროპული ქვეყნების თავდაცვისუნარიანობის გაზრდასთან დაკავშირებით.

“მინდა, გამოვეხმაურო აშშ-ის პრეზიდენტის ბარაკ ობამას მიერ ვარშავაში გაკეთებულ განცხადებას კონგრესისადმი ერთი მილიარდი დოლარდის მოთხოვნით მისი მიმართვის თაობაზე, რომელიც გულისხმობს აღმოსავლეთ და ცენტრალური ევროპის ქვეყნების, მათ შორის უკრაინის, მოლდოვის და რაც ჩვენთვის ყველაზე მთავარია, საქართველოსთვის ერთობლივი წვრთნების, თავდაცვითი საშუალებების გაძლიერებისა და გაუმჯობესებისათვის კონკრეტული თანხების გამოყოფას. ეს არის ძალიან მნიშვნელოვანი გზავნილი საქართველოსთვის, ჩვენი გრძელვადიანი უსაფრთხოებისა და სტაბილურობის განმტკიცებისთვის. მე დარწმუნებული ვარ, რომ ამ მიმართულებით მოხდება სერიოზული ინტენსიფიკაცია კონსულტაციები, როგორც ორმხრივად აშშ-თან, ისე, ნატოს სხვა დანარჩენ პარტნიორებთან ჩრდილოატლანტიკური ალიანსის შეხვედრების ფორმატში“, - განაცხადა ალექსი პეტრიაშვილმა.

ბარაკ ობამა კონგრესს მოუწოდებს ერთი მილიარდი დოლარი გამოყოს აღმოსავლეთ ევროპაში აშშ-ის სამხედროების განთავსებისთვის.

„ამერიკის პოზიციაა მეტი სამხედრო აღჭურვილობა და სამხედრო ძალების გაძლიერება ჩვენს მოკავშირეებთან ერთად ევროპაში. ჩვენ ვაძლიერებთ ჩვენს პარტნიორულ ურთიერთობას მოკავშირეებთან, მათ შორის – უკრაინასთან, საქართველოსა და მოლდოვასთან თავდაცვისუნარიანობის ამაღლების კუთხით“ – განაცხადა ამერიკის პრეზიდენტმა.