საქართველოს საგარეო საქმეთა მინისტრი აშშ-ს პრეზიდენტის ინიციატივას, აღმოსავლეთ ევროპული ქვეყნების თავდაცვისუნარიანობის გაზრდასთან დაკავშირებით, მიესალმება.

მაია ფანჯიკიძის განცხადებით, დეტალებზე ჯერ საუბარი ნაადრევია, ვინაიდან აღნიშნულ თემაზე კონკრეტული დიალოგი დაწყებული არ არის.

"ამერიკის შეერთებული შტატები არის საქართველოს სტრატეგიული პარტნიორი. აშშ-ის პრეზიდენტი არის საქართველოს დიდი მხარდამჭერი და მისი განცხადება იმის თაობაზე, რომ ერთი მილიარდი დოლარი გამოეყოფა უსაფრთხოების ზომების გასაძლიერებლად და იქ არის ლაპარაკი საქართველოზე, არის ძალიან კონკრეტული გზავნილი, რომელსაც ექნება კონკრეტული შედეგი. რა თქმა უნდა ჯერჯერობით დეტალებზე საუბარი ადრეა, რადგან ჩვენ ჯერ ამ თემაზე კონკრეტული დიალოგი არ გვაქვს, მაგრამ ყოველ შემთხვევაში ეს არის ძალიან კონკრეტული განცხადება კონკრეტული ღონისძიებების შესახებ. ჩვენ მივესალმებით ყველაფერს, რაც გააძლიერებს ჩვენს უსაფრთხოებას", - აღნიშნა მაია ფანჯიკიძემ.

მისივ თქმით, საქართველოს უსაფრთხოება მთელი რეგიონის საერთო ინტერესებშია.

"აქედან გამომდინარე, ყველა უნდა იყოს დაინტერესებული, რომ საქართველო იყოს მშვიდი, სტაბილური ქვეყანა. ამით მხოლოდ მოიგებენ ჩვენი მეზობლები", - აღნიშნა ფანჯიკიძემ.

ბარაკ ობამა კონგრესს მოუწოდებს ერთი მილიარდი დოლარი გამოყოს აღმოსავლეთ ევროპაში აშშ-ის სამხედროების განთავსებისთვის.

„ამერიკის პოზიციაა მეტი სამხედრო აღჭურვილობა და სამხედრო ძალების გაძლიერება ჩვენს მოკავშირეებთან ერთად ევროპაში. ჩვენ ვაძლიერებთ ჩვენს პარტნიორულ ურთიერთობას მოკავშირეებთან, მათ შორის – უკრაინასთან, საქართველოსა და მოლდოვასთან თავდაცვისუნარიანობის ამაღლების კუთხით“ – განაცხადა ამერიკის პრეზიდენტმა.