"ნაციონალური მოძრაობის" წევრი გიორგი ბარამიძე აშშ-ს პრეზიდენტის ინიციატივას აღმოსავლეთ ევროპული ქვეყნების თავდაცვისუნარიანობის გაზრდასთან დაკავშირებით დროულს უწოდებს.

თუმცა ბარამიძე მიიჩნევს, რომ ამ საქმეს ერთი მილიარდი დოლარი არ ეყოფა და იმედს გამოთქვამს, რომ დროთა განმავლობაში აღნიშნული თანხა გაიზრდება.

„როცა ყველამ დაინახა, რომ რუსეთს აქვს საკმაოდ მკაფიოდ ჩამოყალიბებული გეგმა და სახელმწიფოებმა რაც არ უნდა აკეთონ, ის ყველა შემთხვევაში ცდილობს, საკუთარ გეგმას მიაღწიოს, ობამას ეს გადაწყვეტილება ძალიან დროულია. თუ რუსეთი დაინახავს, რომ ადვილად შეუძლია, ესა თუ ის სახელმწიფო გადაყლაპოს, ამას უფრო მეტი ენთუზიაზმით გააკეთებს და დიდი იქნება ალბათობა რუსეთის აგრესიული ქმედებებისა“,- განუცხადა ჟურნალისტებს გიორგი ბარამიძემ.

ბარაკ ობამა კონგრესს მოუწოდებს ერთი მილიარდი დოლარი გამოყოს აღმოსავლეთ ევროპაში აშშ-ის სამხედროების განთავსებისთვის.

„ამერიკის პოზიციაა მეტი სამხედრო აღჭურვილობა და სამხედრო ძალების გაძლიერება ჩვენს მოკავშირეებთან ერთად ევროპაში. ჩვენ ვაძლიერებთ ჩვენს პარტნიორულ ურთიერთობას მოკავშირეებთან, მათ შორის – უკრაინასთან, საქართველოსა და მოლდოვასთან თავდაცვისუნარიანობის ამაღლების კუთხით“ – განაცხადა ამერიკის პრეზიდენტმა.