თენგიზ კიტოვანი აფხაზეთში შეჭრას გეგმავს

პოლიტიკა - 13:52, 03 Jun, 2014

2687

ყოფილი თავდაცვის მინისტრის საქართველოში ჩამოსვლასა და გააქტიურებას არაერთი ვერსია მოჰყვა. იგი ირწმუნება, რომ სამშობლოში ნარკოტიკების წინააღმდეგ საბრძოლველად ჩამოვიდა.

„გალელი ქართველები ხაჯიმბას დასანახად ვერ იტანენ და როცა ბოლო საპრეზიდენოტო არჩევნებში ანქვაბმა მოუგო ხაჯიმბას, ეს დიდნაწილად მათი ანქვაბისადმი ერთსულოვანმა მხარდაჭერამ განაპირობა.

შეიძლება ითქვას, ხაჯიმბას პირადი შურისძიების მოტივიც აქვს გალელი ქართველების მიმართ და ამას სიამოვნებით გააკეთებს, მით უფრო, ეს რუსეთის დაკვეთაც არის. ცხადია, ყველა ქართველი თავჩაღუნული უსიტყვიოდ არ დატოვებს სახლ-კარს და ბევრი წინააღმდეგობასაც გაუწევს სეპარატისტებს, მათ შორის, სავარაუდოდ, შეიარაღებულსაც.

„გრუ“-ს გეგმის თანახმად, სწორედ აქ უნდა გამოჩნდეს თენგიზ კიტოვანი თავისი მომხრეებით. კიტოვანი და ორგანიზაციის წევრები შემოიკრებენ თანამოაზრეებს და გალელი ქართველების დასაცავად, სამეგრელოში ჩავლენ. მართალია სამგრელოში კიტოვანს დიდი სიხარულით არავინ დახვდება, რადგან ამ რეგიონის მაცხოვრებლებს ბევრი საშინელება დააწია კიტოვანმა... სამეგრელოს ტერიტორიაზე საბრძოლო მოქმედებების გადმოტანა, ფაქტობრივად, რუსეთ-საქართველოს ახალი ომი იქნება და ეს ომი რა შედეგით დასრულდება, ძნელი წარმოსადგენი არ არის“, - წერს „ალია“.

თუმცა თავდაცვის ყოფილი მინისტრის თქმით, ის საქართველოში პროვოკაციისთვის არ დაბრუნებულა.

„ჩემი შვილებისა და შვილიშვილების სანახავად ჩამოვედი. სააკაშვილი 10 წელი არ მიშვებდა საქართველოში და ახლა ჩამოვედი... გალიდან აფხაზებმა ქართველები რომ გამოყარონ მათ დასახმარებლად წავალ, აბა, არ წავალ? გვერდში დავუდგები და დავიცავ, რითაც შემეძლება, მაგრამ გალელებს კი არა, ყველა ქართველს დავუდგები გვერდით, ვინც დაკარგული ტერიტორიების დაბრუნებას შეეცდება. თუ გალში რამე მოხდა, მე ჩემით იარაღს არ ავიღებ, მთავრობასთან შეთანხმების გარეშე არ ავიღებ იარაღს. თუ ომი დაიწყო, მხოლოდ მთავრობასთან შეთანხმებით წავალთ და ვიბრძოლებთ, მაგრამ ისე, ჩემი ინიციატივით, არსად არ ჩავერევი. მე ნუ დააბრალებენ, თუ სადმე რამე მოხდა. აფხაზეთში ისედაც მყიფეა ვითარება და ომი თუ დაიწყო, კიტოვანი არაფერ შუაში არ იქნება... ვინც ეგ გითხრათ, რომ თენგიზ კიტოვანი აფხაზეთის ომის პროვიცირებას აპირებსო, გადაეცით, რომ თვითონ არის პროვიკატორი და რუსეთის აგენტი“, - აცხადებს კიტოვანი.