„საქართველოს კარგ მაგალითს იძლევა იმისა, თუ როგორი უნდა იყოს თანამშრომლობა გამყოფი ხაზების გასწვრივ“, -ამის შესახებ შვეიცარიის კონფედერაციის პრეზიდენტმა, დიდიე ბურკჰალტერმა ჟურნალისტებს ერგნეთში განუცხადა, სადაც ინციდენტების პრევენციისა და მათზე რეაგირების მექანიზმის ჯგუფის მუშაობას გაეცნო.

"ჩემი ვიზიტის მთავარი მიზანია, ინციდენტების პრევენციისა და მათზე რეაგირების ჯგუფის წარმომადგენლებს მადლობა გადაგიხადოთ თქვენი პრაგმატული მუშაობისთვის. ეს შეხვედრა გახლავთ ჩემი, როგორც ეუთო-ს თავმჯდომარის ვიზიტის ნაწილი სამხრეთ კავკასიაში. ჩემზე ღრმა შთაბეჭდილება მაოხდინა თქვენს მიერ ჩატარებულმა სამუშაომ, რომელიც უზრუნველყოფს სტაბილურობას და უსაფრთხოებას ადგილზე. აღმოსავლეთ უკრაინაში განვითარებული მოვლენების ფონზე, თქვენ კარგ მაგალითს იძლევით იმისა, თუ როგორი უნდა იყოს თანამშრომლობა გამყოფი ხაზების გასწვრივ. უსაფრთხოების ჯგუფი ყოველთვიურად იკრიბება კარავში და ერთობლივად განიხილავს უსაფრთხოების საკითხებსა და ცდილობს კონფლიქტში დაზარალებულების ცხოვრების გაუმჯობესებას. ჩემი აზრით, ყველაზე მნიშვნელოვანი საკითხია, გახსოვდეთ ადმინისტრაციულ სასაზღვრო ზოლში მცხოვრებთა საჭიროებები და უფლებები. მე არასდროს დამავიწყდება კარავი, რომელიც აქ დღეს ვნახე", - განაცხადა დიდიე ბურკჰალტერმა.

დიდიე ბურკჰალტერი დღეს თავის ქართველ კოლეგას გიორგი მარგველაშვილს შეხვდება. ასევე გაიმართება შეხვედრა საქართველოს პრემიერ-მინისტრთან და საგარეო საქმეთა მინისტრთან.