ბოკერია: ნატო-ში გაწევრიანების შემთხვევაში აფხაზეთის დაკარგვა მტკნარი სიცრუეა

პოლიტიკა - 18:10, 02 Jun, 2014

2228

საქართელოს უშიშროების საბჭოს ყოფილი მდივანი გიგა ბოკერია ჟურნალისტებთან საუბრისას აცხადებს, რომ კონცეფცია იმის შესახებ, რომ საქართველოს ნატო-ში გაწევრიანება აფხაზეთის დაკარგვას ნიშნავს, რუსეთთან დაკავშირებული ძალების მხრიდან არის შემოგდებული:

"ჯერ კიდევ 2008 წლის დასაწყისში რუსეთთან დაკავშირებული ძალების მხრიდან იქნა შემოგდებული კონცეფცია, რომ ნატო-ში გაწევრიანება აფხაზეთის დაკარგვას ნიშნავს და ამიტომ უნდა დავფიქრდეთ. ეს არის, ფაქტობრივად, მტკნარი სიცრუე. ჩვენ უნდა გვახსოვდეს, რომ რუსეთის სამიზნეა მთელი ქართული სახელმწიფო. დღეს მას ოკუპირებული აქვს ქვეყნის ტერიტორიების 20%. სვლა ნატო-სა და ევროპისკენ არის ჩვენი სუვერენიტეტის, თავისუფლების გადარჩენის გზა. საბოლოო ჯამში, შეიძლება არამყისიერად ამ ტერიტორიების მშვიდობიანად დაბრუნება, რადგან რუსეთის სამიზნე არ იყო აფხაზეთი, მით უფრო ცხინვალის რეგიონი, მისი სამიზნე მთელი საქართველოა. მინდა გაგახსენოთ, რომ ჩვენივე გუნდის შეთავაზებული იყო კონცეფცია იმის შესახებ, რომ საქართველოს ნატოში გაწევრიანება არ ნიშნავს, რომ ნატო-ს წესდების მეხუთე მუხლი ქვეყნის ოკუპირებულ ტერიტორიებზე ავტომატურად გავრცელდება. არის ამისი ისტორიული მაგალითები, ყველაზე დიდი მაგალითია გერმანიის მაგალითი, როცა დასავლეთ გერმანია არასდროს ცნობდა აღმოსავლეთ გერმანიას ლეგიტიმურ სახელმწიფოდ, არც მის მთავრობას ცნობდა ლეგიტიმურად, მაგრამ ის აგრძელებდა საკუთარი თავისუფლების დაცვას, განვითარებას და საბოლოო ჯამში ბერლინის კედელი დაინგრა. არსებობს სხვა ანალოგიებიც", - განუცხადა ჟურნალისტებს გიგა ბოკერიამ.