პუტინს თუ ეცოდინება, რომ შანტაჟი საქართველოზე გაჭრის, ყოველ მოსახვევში გამოიყენებს

პუტინს თუ ეცოდინება, რომ შანტაჟი საქართველოზე გაჭრის, ყოველ მოსახვევში გამოიყენებს - ნიკა რურუა

სოც.მედია - 17:43, 02 Jun, 2014

1148

კულტურის ყოფილი მინისტრი ნიკა რურუა აფხაზეთის თვითაღიარებულ რესპუბილკაში ხაჯიმბას ხელისუფლებაში მოსვლის შესაძლო რეზულტატებზე საუბრობს და აღნიშნავს, რომ მიუხედავად ნებისმიერი დანაშაულებრივი გეგმისა, რომელსაც რუსეთიდან უნდა ველოდოთ, საქართველომ არ უნდა თქვას უარი ასოცირების ხელშეკრულების ხელმოწერაზე, რომელიც ქვეყნის სუვერენიტეტზე უარის თქმის ტოლფასი იქნება.

,,რამდენიმე სანდო ადამიანმა შეშფოთებულმა მომმართა აფხაზეთში, სეპარატისტულ-საოკუპაციო ხელისუფლებაში ანქვაბის ხაჯიმბათი შეცვლის შესაძლო რეზულტატებზე. მთავარი საკითხი მათ სიტყვებში იყო ის, რომ რუსეთი ახალ მარიონეტს, ხაჯიმბას დაავალებს გალის რაიონიდან ეთნიკური ქართველების გამოძევების, ანუ ხელახალი ეთნიკური წმენდის ჩატარებას, თუ საქართველო ხელს მოაწერს ევროპის კავშირთან ასოცირებული წევრობის ხელშეკრულებას.

მეც არ გამოვირიცხავ ამგვარ განვითარებას, მაგრამ მიუხედავად ამ დანაშაულებრივი გეგმისა, თუ ის ნამდვილად არსებობს, საქართველომ არაფრის დიდებით არ უნდა თქვას ამ ისტორიულ გარღვევაზე, ანუ ასოცირების ხელშეკრულების ხელმოწერაზე უარი - ასეთი უარი საქართველოს სუვერენიტეტზე უარის თქმის ტოლფასი იქნება, ვინაიდან გალის რეგიონში დარჩენილი ქართული მოსახლეობის გამოძევების საფრთხე მუდმივად ეფექტურ საშანტაჟო ინსტრუმენტად იქცევა პუტინის რუსეთის ხელში. ის ამ იარაღს, თუ ეცოდინება, რომ საქართველოზე ეს შანტაჟი გაჭრის, ყოველ მოსახვევში გამოიყენებს ჩვენს წინააღმდეგ.

ასე რომ, ასოცირების ხელშეკრულებაზე უარი საქართველოს დამოუკიდებელ, თავისუფალ და უსაფრთხო მომავალზე უარის თქმაა. რაოდენ დიდიც არ უნდა იყოს ტკივილი საქართველოს ერთ-ერთი რეგიონისა, ეს ტკივილი ასატანია მთლიანი ქვეყნის, ერის და მისი მომავლის გულისათვის.

არანაირი შანტაჟი არ გავა, თუ მტერს ეცოდინება, რომ ყველანაირ ტკივილს ავიტანთ სამშობლოს თავისუფალი მომავლისათვის“, - წერს ნიკა რურუა ,,ფეისბუქის“ გვერდზე.