ნატოს საპარლამენტო ასამბლეას ერთერთი მოხსენება საქართველოსა და ნატოს პარტნიორობის შესახებ ლიტვის ყოფილმა თავდაცვის მინისტრმა, ამჟამად კი ქვეყნის დელეგაციის წევრმა ნატოში რასა იუკნევიჩენესმა წარუდგინა.

იუკნევიჩენესი „კვირის პალიტრასთან“ საუბრისას აცხადებს, რომ ასამბლეამ რეზოლუცია ლიტვის დელეგაციის წინადადებით მიიღო:

„მიუხედავად იმისა, რომ საპარლამენტო ასამბლეა ნატოს ვერ ავალდებულებს, გზავნილს, რომ საქართველოსთვის მაპ-ის მიცემის საკითხი უკვე „მაგიდაზე დევს“, უდიდესი პოლიტიკური მნიშვნელობა აქვს. ჩვენ, ლიტველები, თქვენს გვერდით ვართ და გვჯერა, რომ ნატომ არ უნდა გადაუხვიოს გაფართოების პროცესს და ყურად უნდა იღოს იმ კანდიდატი ქვეყნების სურვილი, ვისაც ალიანსში გაწევრიანება სურს. სწორედ ეს არის ნატოს ღია პოლიტიკის არსი.

ჩვენ ვფიქრობთ, რომ ბუქარესტის სამიტზე საქართველოსთვის მაპის მიუცემლობით ალიანსმა დაუშვა სავალალო შეცდომა, რომლის შედეგებსაც ახლა მთელი ევროპა იმკის. რუსეთი ალიანსის მხრიდან ყოველგვარი პროვოცირების გარეშეც დაესხა საქართველოს თავს. შედეგად საქართველო მაპის გარეშეც დარჩა და რუსეთის აგრესიაც იწვნია. აი, ამიტომ ვთვლით, რომ ახლა უკვე აუცილებელია, საქართველოსკენ შემხვედრი ნაბიჯების გადადგმა.

წინ საკმაოდ მწვავე ბრძოლები გელით. ვითარებას საღი თვალით შეხედეთ, ნატოს საპარლამენტო ასამბლეას, მიუხედავად მისი სტატუსისა, მხოლოდ რეკომენდაციის გაცემა შეუძლია“, - აცხადებს იუკნევიჩენესი.