ბავშვთა დაცვის საერთაშორისო დღესთან დაკავშირებით, სოფლის მეურნეობის სამინისტროს ეზოში საზეიმო ღონისძიება გაიმართა. სოფლის მეურნეობის მინისტრის პირველმა მოადგილემ, ოთარ დანელიამ გორში და რუსთავში მცხოვრებ საქართველოს ოკუპირებული ტერიტორიებიდან დევნილ ბავშვებს და სოფლის მეურნეობის სამინისტროს სისტემაში შემავალი უწყებების თანამშრომლების შვილებს უმასპინძლა.

ოთარ დანელიამ ბავშვებს 1 ივნისი მიულოცა და მათთან ერთად გამართულ ღონისძიებებში მიიღო მონაწილეობა.

,,ჩვენთან დღეს სტუმრად არიან ბავშვები გორიდან და რუსთავიდან. მინდა მათ განსაკუთრებულ მადლობას გადავუხადო მობრძანებისთვის. ეს პატარები სახელმწიფოს მხრიდან მეტ ზრუნვას და ყურადღებას იმსახურებენ. თქვენზე ზრუნვა ჩვენი უპირველესი მოვალეობაა. ჩვენ უნდა ვიზრუნოთ თქვენზე, უნდა შეგიქმნათ ჯანსაღი გარემო, რომ გაიზარდოთ ლაღები და ბედნიერები. ჩვენ გვინდოდა მოგვეწყო თქვენთვის ნამდვილი ზეიმი. მოვიწვიეთ ზღაპრის გმირები, ჯამბაზი და ილუზიონისტი. მოხარული ვიქნები თუ ეს დღე თქვენთვის სასიამოვნო მოგონებად დარჩება“, - განუცხადა ოთარ დანელიამ ბავშვებს.

ღონისძიების დასასრულს სოფლის მეურნეობის მინისტრის პირველმა მოადგილემ ბავშვებთან ერთად საზეიმოდ დაჭრა უზარმაზარი ტორტი. კომპანია „ზედაზენი“ კი პატარებს გამაგრილებელი სასმელებით გაუმასპინძლდა.