"ერთიანი ნაციონალური მოძრაობა" ხელისუფლებას ოპოზიციური პარტიის კანდიდატების დაშინებასა და დაშანტაჟებაში ადანაშაულებს. ამის მაგალითად ,,ნაციონალური მოძრაობა“ ოზურგეთში პრემიერის მიერ გაკეთებულ განცხადებებს ასახელებს.

"ოზურგეთში ღარიბაშვილმა უკვე ღიად გამოაცხადა ის, რასაც ბოლო ორი კვირაა სწორედ პრემიერ-მინისტრის დავალებით სჩადის საქართველოს ხელისუფლება. დიახ, საქართველოს ხელისუფლება არ და ვერ დაუშვებს, რომ რომელიმე სოფელსა თუ რაიონში გაიმარჯვოს სხვა პოლიტიკურმა ძალამ და ამისათვის ყველაფერს აკეთებს, აშანტაჟებს და აშინებს კანდიდატებს, ზეწოლას ახორციელებს მათი ოჯახის წევრებსა და ახლობლებზე, იყენებს ძალოვანი სტრუქტურების ყველანაირ რესურსს და მაქსიმალურად ცდილობს არჩევნების შედეგი არჩევნების დღემდე გააფორმოს. სწორედ ეს ხდება საქართველოს უმეტეს საარჩევნო ოლქებში. შინაგან საქმეთა სამინისტრო არის ამ დაშინებებისა და ზეწოლის უშუალო შემსრულებელი და ამ პროცესს კოორდინაციას მინისტრის პირველი მოადგილე ზედელაშვილი უწევს.

დმანისის საარჩევნო ოლქში შექმნილი სიტუაცია საზოგადოებისთვის უკვე ცნობილია. მიუხედავად ცესკოს თავმჯდომარის, არასამთავრობო ორგანიზაციების მიერ გაკეთებული განცხადებისა, მიუხედავად პრესის საკმაო მაღალი ყურადღებისა, ზეწოლა, დაშინება და შანტაჟი ისევ გრძელდება. ამ პროცესს დმანისის პოლიციის უფროსი გიგანი ხელმძღვანელობს. 30 მაისს, "ერთიანი ნაციონალური მოძრაობის" კიდევ ორმა კანდიდატმა "საკუთარი სურვილით" უარი განაცხადა კანდიდატობაზე. ესენი არიან მარინა ბეგდარაშვილი (პარტიული სიის #16) და შოთა ადუაშვილი (პარტიული სიის #6 და განთიადის თემის მაჟორიტარობის კანდიდატი). ამ უკანასკნელთან გუშინ დილით თბილისიდან ჩამოვიდა მისი ძმის შვილი - მევლუდ ადუაშვილი და აიძულა ბიძა განცხადება დაეწერა, რათა მას და მის ბიზნესს პრობლემები არ შექმნოდა. დაძაბული ვითარებაა მარნეულის საარჩევნო ოლქშიც. საკითხი შეეხება "ერთიანი ნაციონალური მოძრაობის" გამგებლობის კანდიდატს - აკმამედ იმამგულიევს. პირველივე დღიდან, როგორც კი ცნობილი გახდა, რომ ბატონი იმამგულიევი იქნებოდა გამგებლობის კანდიდატი, საკმაოდ ბევრი ადამიანის, მათ შორის მაღალი თანამდებობის პირების, მათი ნათესავების, პარლამენტის წევრების მხრიდან იყო პირდაპირი მცდელობა, რათა დაეთანხმებინათ იმამგულიევი მოეხსა კანდიდატურა. თუმცა ვერანაირი დაპირებებითა და დაშინებით შედეგს ვერ მიაღწიეს. ამჟამად ახალი მცდელობა წამოიწყეს - დღემდე სრულიად უცნობი არასამთავრობო სადამკვირვებლო ორგანიზაციის "თავისუფალი განვითარებისა და უფლებების დაცვის ასოციაციის" თვმჯდომარის ემზარ პაქსაძის სახელით ცესკოში შევიდა განცხადება იმამგულიევის რეგისტრაციის გაუქმების მოთხოვნით, იმ მოტივით რომ მას ბოლო ორი წელი მუდმივად არ უცხოვრია საქართველოში", - აღნიშნულია განცხადებაში.

"ნაციონალური მოძრაობა" ცესკო-ს, უწყებათაშორის კომისიას და სადამკვირვებლო ორგანიზაციებს რეაგირებისკენ მოუწოდებს.

"მივმართავთ ცესკოს, გამოიჩინოს ობიექტურობა, დაიცვას საარჩევნო კანონმდებლობით განსაზღვრული ერთ-ერთი მთავარი მოვალეობა - ყველა საარჩევნო სუბიექტისთვის უზრუნველოს თანაბარი, ერთგვაროვანი საარჩევნო პირობები და გარემო, არ გახდეს ხელისუფლების ბრმა ინსტრუმენტი კანდიდატებსა და საარჩევნო სუბიექტებზე ზეწოლის აღვირახსნილ კამპანიაში. მივმართავთ უწყებათაშორის კომისიას, უზრუნველყოს კანდიდატებზე ზეწოლისა და მათი შანტაჟის თითოეული ფაქტის გამოძიება და კანონით დადგენილი ზემოქმედების განხორციელება. მივმართავთ საერთაშორისო და ადგილობრივ სადამკვირებლო და არასამთავრობო ორგანიზაციებს განახორციელონ მონიტორინგი თითოეულ ასეთ ფაქტზე", - ნათქვამია განცხადებაში.

საქართველოს პრემიერ-მინისტრმა ირაკლი ღარიბაშვილმა ოზურგეთში კოალიცია "ქართული ოცნების" კანდიდატების წარდგენისას განაცხადა, რომ ,,ქართული ოცნება“ არ ადუშვებს არცერთ რაიონში სხვა პოლიტიკური ძალის გამარჯვებას. პრემირის განმარტებით, ,,ეს ძალიან პრინციპული საკითხია“.

"ჩვენ არც ერთ რაიონში, მე მინდა კიდევ ერთხელ ვთქვა, რომ საქართველოს არც ერთ რაიონში ჩვენ არ უნდა დავუშვათ სხვა პოლიტიკური ძალის გამარჯვება. ეს იქნება პირველ რიგში დამაზიანებელი იმ რაიონის მოსახლეობისთვის, რომელმაც შეიძლება, რომ აირჩიოს სხვა პოლიტიკური ძალის გამგებელი თუ მერი. ეს არის ძალიან პრინციპული საკითხი", - აღნიშნა ირაკლი ღარიბაშვილმა.