საქართველოს პრემიერ-მინისტრმა ჩოხატაურის რაიონის სოფელ ხიდისთავის მოსახლეობასთან შეხვედრაზე განაცხადა, რომ ხელისუფლება ეტაპობრივად აგვარებს წლების განმავლობაში დაგროვილ პრობლემებს.

შეხვედრა ნოდარ დუმბაძის სახელობის მუზეუმის ეზოში გაიმართა. ირაკლი ღარიბაშვილმა ცნობილი ქართველი მწერლის მუზეუმი დაათვალიერა და ადგილობრივებს გაესაუბრა. მოსახლეობის განცხადებით, სოფელს სასმელი წყლისა და გაზიფიცირებასთან დაკავშირებული პრობლემემა აწუხებს, გამაგრებას საჭიროებს სოფლის ცენტრში არსებული ხიდი.

"სოციალური დახმარებების გაცემის წესი უსამართლოა და არჩევნების შემდეგ ვაპირებთ, გადავხედოთ ამ სისტემას, რადგან წლების განმავლობაში გროვდებოდა ეს უსამართლობა. სამწუხაროა, რომ 21-ე საუკუნეში არსებობს სოფლები, სადაც გაზი და ელექტროენერგია არ არის. ჩვენ შევისწავლეთ, რომელ რეგიონში რისი წარმოება არის შესაძლებელი და ხვალიდან ვიწყებთ პროგრამას "აწარმოე საქართველოში", რომელიც ადგილობრივი წარმოების განვითარებას ისახავს მიზნად. ჩვენ ეტაპობრივად ვაგვარებთ წლების განმავლობაში დაგროვილ პრობლემებს. ვაგრძელებთ სოფლის მხარდაჭერის პროგრამას. მთავრობა ქმნის ყველა პირობას, რომ ბიზნესი განვითარდეს ქვეყანაში", - აღნიშნა ირაკლი ღარიბაშვილმა.