თავისუფლების განვითარების ინსტიტუტმა შინაგან საქმეთა სამინისტროს ოფიციალური „ფეისბუქ“–გვერდის მონიტორინგი განახორციელა. IDFI-ის მიერ გამოქვეყნებული მასალიდან ირკვევა, რომ შს მინისტრის „facebook“-გვერდის გადახედვისას დადებითი შინაარსის კომენტარების სიჭარბე შეიმჩნევა.

მათივე ინფორმაციით, კომენტარების დამწერთა უმეტესობა აღნიშნულ „Facebook“–ანგარიშს პირადი ინტერესებისთვის არ იყენებს და მხოლოდ კონკრეტული მიზნებისთვის აქვს შექმნილი.

ინსტიტუტმა ჩაატარა ექსპერიმენტი და უწყების „ფეისბუქ“– გვერდზე ასეთი შინაარსის კომენტარი განათავსა: „გამარჯობა. რატომ იშლება კომენტარები და რატომ არის მხოლოდ დადებითი შინაარსის მოსაზრებები დატოვებული ყველა პოსტზე?“.

"დღეისათვის ეს კომენტარი ამავე ანგარიშიდან ჩანს, თუმცა თუ მინისტრის გვერდზე Facebook-ის სხვა ანგარიშიდან შეხვალთ, აღნიშნულ შეკითხვას ვეღარ ნახავთ. როგორც მოგეხსენებათ, Facebook ადმინისტრაციამ ბოლო დროს დაამატა კომენტარების დამალვის ფუნქცია. მისი გამოყენების შემთხვევაში, კომენტარის ავტორი ვერ ხვდება რომ მისი მოსაზრება გვერდის ადმინისტრატორმა სხვა ადამიანებისთვის შეუმჩნეველი გახადა. მსგავსი ფაქტი დავაფიქსირეთ 2013 წლის ბოლოს შინაგან საქმეთა სამინისტროს ოფიციალურ Facebook გვერდზე", - აცხადებენ IDFI-ში.

ამასთან, IDFI–მ გამოიკვლია კომენტარების იმ ავტორების ნამდვილობაც, რომლებიც მინისტრის გვერდზე აქტიურობენ.

„ჩვენი აზრით, 48 მომხმარებლიდან სავარაუდოდ, მინიმუმ, 24–ის Facebook–პროფილი ნამდვილი არ უნდა იყოს. ამის თქმის საშუალებას იძლევა რამდენიმე ფაქტი. პირველ რიგში, მათი უმეტესობა შექმნილია 2014 წლის დასაწყისში (ძირითადად სამი თვე, იანვარი, თებერვალი და მარტი – 36 შემთხვევა) ან 2013 წელს (5 შემთხვევა). პროფილის ყველა ფოტო ატვირთულია ერთსა და იმავე დღეს, უმეტესწილად Facebook ანგარიშის შექმნის პარალელურად, დროის ერთ მონაკვეთში, წამებისა და წუთების ინტერვალით. რაც ყველაზე მნიშვნელოვანია, პროფილის ფოტოების გარდა, იშვიათია მათი მხრიდან სოციალურ ქსელში აქტივობა. რაც ყველაზე მეტად საინტერესოა, მათი მეგობრების შემოწმებით გამოჩნდა, რომ ამგვარ ადამიანებს ბევრი საერთო მეგობარი ჰყავდათ. ერთი საინტერესო გარემოებაც დაფიქსირდა: პიროვნება გიორგი დვალიშვილის სახელზე პროფილის ფოტოდ დაყენებული იყო ერთ-ერთი არასამთავრობო ორგანიზაციის – „ადამიანის უფლებების სწავლებისა და მონიტორინგის ცენტრის“ წარმომადგენლის – ვახუშტი მენაბდეს სურათი. მხოლოდ რამდენიმე ერთეული ადამიანის პროფილის ჭეშმარიტება არ იწვევდა ეჭვს. მათი რაოდენობა 6-დან 10-ს შორის მერყევობს...თითქმის მსგავსი შემთხვევები დაფიქსირდა 2012 წელს დიმიტრი შაშკინის ოფიციალურ „Facebook“–გვერდზე, როდესაც ის იკავებდა ჯერ თავდაცვის მინისტრის და მოგვიანებით განათლებისა და მეცნიერების მინისტრის პოსტებს“,- აღნიშნულია IDFI-ს ანგარიშში.