ეთნოსთაშორისი ურთიერთობების სფეროში მომუშავე არასამთავრობო ორგანიზაციები გარდაბანში მომხდარ ინციდენტთან დაკავშირებით საერთო განცხადებას ავრცელებენ

გუშინ, 28 მაისს, ღამის 12.00 სთ. გარდაბანში ადგილობრივ მოსახლეობას, კერძოდ ეთნიკურ აზერბაიჯანელებსა და ქართველებს (სვანებს) შორის დაპირისპირება მოხდა, რომელსაც ადგილი ჰქონდა ბენზინგასამართ სადგურ „სოკარ“-ის ტერიტორიაზე მდებარე მარკეტთან. თავდაპირველად ინციდენტი რამოდენიმე პირს შორის მოხდა, თუმცა ის ამით არ ამოიწურა და მოგვიანებით ინციდენტში მონაწილე სვანების საახლობლო გაემართა გარდაბნის ჩაიხანაში, სადაც „ერთიანი ნაციონალური მოძრაობის“ მხარდამჭერი აზერბაიჯანელები იმყოფებონდნენ, რომელთაც თავდაპირველ ინციდენტთან კავშირი არ ჰქონდათ. მიუხედავად ამისა, მათ მიაყენეს ფიზიკური შეურაცხყოფა, რის შემდეგაც დაპირისპირებამ უფრო მასშტაბური სახე მიიღო, სადაც მონაწილეობას 400მდე ადამიანი იღებდა. ინციდენტი დილის 5 საათამდე გაგრძელდა, მიუხედავად ადგილობრივ სამართალდამცავთა მცდელობისა განემუხტა სიტუაცია. მხოლოდ სპეცრაზმის ჩარევის შემდეგ მოხერხდა სიტუაციის დროებითი განმუხტვა, თუმცა დილიდან გარდაბნის ცენტრში ორივე მხარის წარმომადგენლები კვლავ შეიკრიბნენ. მათი რიცხვი 150 კაცს აღწევს და ვითარება უფრო და უფრო იძაბება. აღსანიშნავია, რომ შეკრებილ საზოგადოებაში აქტიურად შეინიშნებიან პოლიტიკური პარტიების ადგილობრივი ლიდერები, ასევე შეიმჩნევა ცალკეულ პირთა მხრიდან კონფლიქტის პროვოცირება რელიგიური ნიშნით, თუმცა ის არ ჰპოვებს მხარდაჭერას შეკრებილთა შორის.

ჩვენ, განცხადებაზე ხელმომწერი ორგანიზაციები, შეშფოთებას გამოვთქვამთ შექმნილ ვითარებასთან დაკავშირებით, რომელიც შესაძლოა კიდევ უფრო გამწვავდეს და დაპირისპირებამ ეთნიკური ელფერი მიიღოს. მივმართავთ სამართალდამცავ სტრუქტურებს, დროულად მიიღონ შესაბამისი ზომები, რათა ფაქტი ოპერატიულად იქნას გამოძიებული და გატარდეს კანონით განსაზღვრული სანქციები დამნაშავე პირების მიმართ. გარდა ამისა, მოვუწოდებთ ადგილობრივი პოლიტიკური პარტიების აქტივისტებს, სიფრთხილით მოეკიდონ შექმნილ ვითარებას და თავი შეიკავონ ინციდენტში ჩარევისაგან პოლიტიკური ქულების მოპოვების მიზნით. ასევე გარდაბნის მოსახლეობას მოვუწოდებთ სიმშვიდისაკენ და რომ თავიანთი ქვემდებებით არ შეაფერხონ შესაბამისი სტრუქტურების მუშაობა. ამას გარდა, მივმართავთ მედიას, რათა ჟურნალისტური ეთიკის ქარტიის ფარგლებში იმოქმედონ.

არნოლდ სტეფანიანი, საერთო-სამოქალაქო მოძრაობა „მრავალეროვანი საქართველო“

ზვიად დევდარიანი, სამოქალაქო განვითარების სააგენტო (CiDA)

აგიტ მირზოევი, ეთნოსთაშორისი თანამშრომლობისა და კონსულტაციების ანალიტიკური ცენტრი

ზაურ ხალილოვი, სამოქალაქო ინტეგრციის ფონდი