არასამთავრობო ორგანიზაციები ოპოზიციური პარტიების კანდიდატებზე ზეწოლაზე საუბრობენ. აღნიშნულთან დაკავშირებით "სამართლიანი არჩევნების" ხელმძღვანელმა ნინო ლომჯარიამ, "საერთაშორისო "გამჭვირვალობა – საქართველოს" აღმასრულებელმა დირექტორმა ეკა გიგაურმა და საიას ხელმძღვანელმა კახა კოჟორიძემ ერთობლი პრესკონფერენციაზე ისაუბრეს.

მათი ინფორმაციით, სხვადასხვა ოპოზიციური პარტიების კანდიდატები საკუთარ კანდიდატურებს ზეწოლის შედეგად ხსნიან. არასამთავრობოს წარმომადგენლების განცხადებით, ამ ეტაპზე საკუთარი კანდიდატურა ზეწოლი შედეგად 32-მა კანდიდატმა მოხსნა.

მათი თქმით, "სახალხო პარტიის" მცხეთის წარმომადგენელი ლაშა ბოლოთაშვილი აცხადებს, რომ კანდიდატებზე ზეწოლა მცხეთის მაჟორიტარმა პარლამენტის წევრმა დიმიტრი ხუნდაძემ განახორციელა.

"ზეწოლა მიმდინარეობს ძირითადად "ერთიანი ნაციონალური მოძრაობის" კანდიდატებზე, თუმცა დაფიქსირდა სხვა პოლიტიკური ძალების კანდიდატებზე ზეწოლაც. მუქარა ძირითადად ოჯახის წევრების მიმართ გამოიხატება, რომ ისინი გათავისუფლდებიან სხვადასხვა დაკავებული თანამდებობიდან. ამას აქვს მასშტაბური ხასიათი. ზეწოლაში ჩართული არიან როგორც ადგილობრივი თვითმართველობის თანამდებობის პირები, ასევე გაჟღერდა დეპუტატის და მოქმედი გამგებლების სახელებიც, ასევე სამართალდამცავების ჩართულობაც დაფიქსირდა", - განაცხადა ნინო ლომჯარიამ.

კახა კოჟორიძის თქმით, ადამიანის მიმართ მუქარა და ზეწოლა სისხლის სამართლის დანაშაულია და პარტიულ სიებში არსებულ კანდიდატთა რეგისტრაციის გაუქმებამ შესაძლოა სხვა საფრთხეებიც შექმნას. კერძოდ, პარტიულ სიაში კანდიდატების არასაკმარისი რაოდენობის გამო, შესაძლოა პარტია რეგისტრაციიდან საერთოდ მოიხსნას.

არასამთავრობოების წარმომადგენლების ინფორმაციით, მსგავსმა ფაქტებმა უკვე ტენდენციის ხასიათი მიიღო. ამ ეტაპზე ცნობილია ხუთი რეგიონის ათ ოლქში მომხდარი მსგავსი შემთხვევის შესახებ. ყველზე რთული მდგომარეობა ამ მხრივ დმანისშია.

არასამთავრობო ორგანიზაციები მოუწოდებენ შინაგან საქმეთა სამინისტროს და მთავარ პროკურატურას, დაინტერესდნენ ზემოთ ჩამოთვლილი ფაქტებით და აღკვეთონ საარჩევნო კანდიდატებსა თუ პარტიების აქტივისტებზე ყოველგვარი ზეწოლა. ასევე სავარაუდო ზეწოლის ფაქტების შესწავლისკენ მოუწოდებენ უწყებათაშორის კომისიას.