საბურთალოს რაიონის გამგებელი გია ხუროშვილი "ჯორჯია უოთერ ენდ ფაუერს" თბილისის მასშტაბით საბოტაჟში ადანაშაულებს და კომპანიის მიმართ ყველაზე მკაცრი საჯარიმო სანქციების ამოქმედებას მოითხოვს.

გია ხუროშვილის განმარტებით, კომპანიამ ნახევარი ქალაქი გადათხარა და სამუშაოები გააჩერა, არ რეაგირებს მოსახლეობის ზარებზე და არ ასრულებს ხელშეკრულებით ნაკისრ ვალდებულებებს.

„თითქმის ყველა დაწყებულ ობიექტზე ამ ეტაპზე გაჩერებულია სამუშაოები, ასევე სამუშაოების წარმოება შეწყვეტილია სოფელ დიღომში, სადაც მოსახლეობას წყალი 30 წელია არ მიეწოდება და GWP-ის მხრიდან არანაირი პასუხი და სამოქმედო გეგმა არ არსებობს“, - აცხადებს ხუროშვილი

ხუროშვილი შესაბამის ორგანოებს მიმართავს, რომ დაუყონებლივ მოახდინონ რეაგირება, საჭიროების შემთხვევაში თბილისის წყლის კომპანია ბაზრიდან გააძეონ და მათთან არსებული ხელშეკრულება შეწყვიტონ.

“მთავრობის უახლოეს სხდომაზე უმკაცრესი საჯარიმო სანქციების ამოქმედების საკითხს დავაყენებ, ასევე დავიწყებ მუშაობას სარჩელზე, რომ ამ კომპანიას შეუწყდეს კონტრაქტი მის მიერ წლების მანძილზე შეუსრულებელი ვალდებულებებისთვის“,- აღნიშნა გია ხუროშვილმა.