კომპანია RMG Gold-ი სპეციალურ განცხადებას ავრცელებს

პოლიტიკა - 16:14, 29 May, 2014

789

კომპანია RMG Gold საყდრისის ლიცენზირებული საბადოს საყდრისი-ყაჩაღიანის უბანზე არსებულ მდგომარეობასთან დაკავშირებით საზოგადოების ინტერესიდან გამომდინარე განცხადებას ავრცელებს.

როგორც RMG Gold-ის განცხადებაშია აღნიშნული, მიუხედავად იმისა, რომ კომპანიას გააჩნია საყდრისის წიაღისეულის ათვისების სრული საკანონმდებლო უფლება, კომპანია თავს იკავებს სრულმაშტაბიანი სამუშაოების განხორციელებისაგან მონიტორინგის გეგმის საბოლოოდ დადგენამდე.

"ნიუპოსტი" უცვლელად გთავაზობთ კომპანიის განცხადებას:
"როგორც ცნობილია, კულტურული მემკვიდრეობის დაცვის ეროვნული სააგენტოს მიერ მოწვეული იყვნენ საერთაშორისო ექსპერტები, რომლებმაც ადგილზე სიტუაციის გაცნობის შემდეგ სააგენტოს წარუდგინეს შუალედური რეკომენდაციები, საყდრისის საბადოს ათვისების სამუშაოების მონიტორინგთან დაკავშირებით. იმედი გვაქვს, რომ უახლოეს დროში სააგენტო მიიღებს საბოლოო რეკომენდაციებს, რომელთა საფუძველზე დადგინდება კომპანიის მიერ საყდრისის საბადოს ათვისების სამუშაოების მონიტორინგის მიმართულებები, პარამეტრები და შედგება მონიტორინგის გეგმა, რომლის საფუძველზეც შემდგომში განხორციელდება სამუშაოების არქეოლოგიური ზედამხედველობა და მონიტორინგი სააგენტოსა და კომპანიას შორის კოორდინაციის პირობებში, საქართველოში მოქმედი კანონმდებლობისა და მსოფლიოში მიღებული პრაქტიკის შესაბამისად.

მიუხედავად იმისა, რომ კომპანიას დღეისათვის გააჩნია საყდრისის წიაღისეული რესურსების ათვისების სრული საკანონმდებლო უფლება, საზოგადოებრივი ინტერესიდან გამომდინარე ჩვენ თავს ვიკავებთ სრულმაშტაბიანი სამუშაოების განხორციელებისაგან მონიტორინგის გეგმის საბოლოოდ დადგენამდე.
აქვე აღვნიშნავთ, რომ კომპანია მზად არის ნებისმიერ დაინტერესებულ მხარესთან კონსტრუქციული თანამშრომლობისათვის", - აღნიშნულია კომპანიის განცხადებაში.