დაბა ხარაგაულში უწყებათაშორისი კომისიის სხდომა მიმდინარეობს. სხდომას იუსტიციის მინისტრი თეა წულუკიანი თავმჯდომარეობს . სხდომას კომისიისა და მოწვეული წევრები ესწრებიან.

სხდომა მინისტრმა კომისიის მოწვეულ წევრზე -− ზურაბ ჭიაბერაშვილზე განხორციელებული თავდასხმის ფაქტზე საუბრით დაიწყო.

თავმჯდომარემ კომისიის სახელით კერძო პირების მიერ ჭიაბერაშვილზე განხორციელებული თავდასხმა დაგმო და აღნიშნა, რომ კომისია დღეს პროკურატურისგან აღნიშნულ თემაზე ამომწურავ ინფორმაციას მიიღებს.

უწყებათაშორისმა კომისიამ ხარაგაულში ადგილობრივი თვითმმართველობის არჩევნებში მონაწილე თითქმის ყველა კანდიდატი მოიწვია, რომლებმაც კომისიის სახელზე არაერთი საჩივარი შემოიტანეს.

საუბარი ეხება „ახალი მემარჯვენეების“ კანდიდატ როინ ხიჯაკაძის განცხადებებს, რომლებიც ეხებოდა სავარაუდოდ, „ნაციონალური მოძრაობის“ წარმომადგენლის, ასევე, „ქართული ოცნების“ წარმომადგენლის მიერ ამომრჩეველზე სავარაუდო ზეწოლას.

იუსტიციის მინისტრის განცხადებით, კომისიისთვის მნიშვნელოვანია, ადგილზე გაეცნოს ამ პრობლემას და მიიღოს შესაბამისი ზომები. მისივე თქმით, დღესვე სხდომაზე დამსწრე არასამთავრობო ორგანიზაციებს, კომისიის წევრებს და პოლიტიკურ სუბიექტებს საშუალება ექნებათ, დღის წესრიგით გათვალისწინებული 8 საკითხის გარდა, წამოჭრან ყველა ის საკითხი, რომლებიც მათ მიზანშეწონილად მიაჩნიათ.

უწყებათაშორის კომისიაში უკვე არსებობს დამკვიდრებული პრაქტიკა, როდესაც კომისიის ხელმძღვანელი სიტუაციის ადგილზე შესასწავლად სხდომას რეგიონებში ატარებს.