ლადო ბედუკაძე ჟურნალისტ ელისო კილაძის ბრალდებებს ეხმაურება. ბედუკაძემ ვარაუდს გამოთქვამს, რომ კილაძეს სამართალდამცავ ორგანოებთან მოუწევს იმის ახსნა თუ საიდან მოიპოვა ფარული აუდიო ჩანაწერები.

"ქალბატონ კილაძეს მოვუწოდებ გაასაჯაროვოს ფსიქიატრთა კოლეგიის (ერთ ფსიქიატრს ვერ ვენდობი) დასკვნა საკუთარი ჯანმრთელობის შესახებ. ჩემს მიმართ წარმოებული სასამართლო პროცესის აუდიო ფაილები დღესაც მაქვს,ხოლო რაც შეეხება სხვა აუდიო თუ ვიდეო მასალებს სავარაუდოდ მოუწევს მას სამართალდამცავ ორგანოებს აუხსნას მათი წარმომავლობის,მოპოვების ან თუნდაც გასაჯაროვების რეალური მიზნების შესახებ. ასე,რომ რასაც გამოთხრის საკუთარ თავს დააბრალოს", - აცხადებს ლადო ბედუკაძე „პირველ რადიოსთან“ საუბარში.

ჟურნალისტმა ელისო კილაძემ ლადო ბედუკაძის მიერ ფარულად ჩაწერილი მასელები გაასაჯაროვა.

ელისო კილაძის თქმით, იმ ფაქტის შემდეგ რაც გაზეთმა "ქრონიკა+ "- მა პრემიერის სიმამრის თამაზ თამაზაშვილის შესახებ პუბლიკაციების გამოქვეყნება დაიწყო, რის შემდეგაც თანამდებობიდან გადადგა ზვიად ჯანყარაშვილი, პრემიერის მეუღლის მამიდაშვილი, თამაზაშვილის დავალებით ლადო ბედუკაძემ მიზანმიმართული კამპანია დაიწყო ქრონიკა + "-ის წინააღმდეგ.

"ლადო ბედუკაძეს ეტყობა დაავიწყდა რომ მთელი მისი ვიდეო და აუდიო შემოქმედება ჩემს ლეპტოპში ინახება ... იქ არის ვიდეოები გლდანის ციხიდან ", - განაცხადა ელისო კილაძემ.

ჟურნალისტის მიერ წარმოდგენილ მასალაში ლადო ბედუკაძის ჩაწერილი აქვს მისი და ვანო ჩხარტიშვილის შეხვედრის აუდიო ვერსია.

" ვანო ჩხარტიშვილი გარკვეულ ფინანსურ დახმარებას უწევდა თურქეთში მის ოჯახს. ჩამოსვლის შემდეგ ჩხარტიშვილმა ის მიიწვია ოფისში სადაც ბედუკაძე მივიდა დიქტაფონით და ჩხარტიშვილთან პირადი საუბარი უკანონოდ ჩაიწერა", - აცხადებს კილაძე.

ბედუკაძემ იმ სასამართლო პროცესების აუდიო ვერსია ჩაიწერა სადაც ციხის სკანდალურ კადრების შემდეგ დახურული სასამართლო სხდომები მიმდინარეობდა. კილაძის თქმით, ბედუკაძემ ეს სხდომა ფარულად ჩაიწერა.

"მას ჩაწერილი ჰყავს გაუპატიურებული მოწმეები ... ეს არის სისხლის სამართლის დანაშაული...“,- აცხადებს ჟურნალისტი.

ელისო კილაძე ამ მასალების გადაცემას პროკურატურისთვის ხვალ გეგმავს.