ფანჯიკიძის უწყება ISAF-ის მისიაში ქართველი სამხედროების ჩართვის გაგრძელებას მიესალმება

პოლიტიკა - 19:37, 28 May, 2014

1412

საგარეო საქმეთა სამინისტრო ბარაკ ობამას განცხადებას ეხმიანება და აღნიშნავს, რომ მძიმე დანაკლისის მიუხედავად, საქართველო მზადაა, ამ უმნიშვნელოვანეს ოპერაციაში ღირსეული წვლილის შეტანა განაგრძოს.

“საქართველო მიესალმება აშშ-ის პრეზიდენტის ბარაკ ობამას განცხადებას, ავღანეთში საერთაშორისო უსაფრთხოების მხარდამჭერი ძალების (ISAF) ოპერაციის დასრულების შემდგომ ქვეყანაში კონტინგენტის შენარჩუნების შესახებ, ავღანურ მხარესთან ორმხრივი უსაფრთხოების შეთანხმების საფუძველზე.
მიგვაჩნია, რომ საერთაშორისო უსაფრთხოების მხარდამჭერი მისია წლების მანძილზე წარმატებულად მოქმედებს ავღანელი ხალხისათვის უსაფრთხოების განმტკიცების, სტაბილურობის შენარჩუნების და უკეთესი მომავლის შექმნის საქმეში. საქართველო დამსახურებულად ამაყობს, რომ ქართველი სამხედროები უკვე წლებია ყოველგვარი შეზღუდვების გარეშე მონაწილეობენ აღნიშნულ ოპერაციაში ჩვენი პარტნიორების მხარდამხარ.
საქართველო მიესალმება ავღანეთში მიღწეული პროგრესის შენარჩუნებისა და განმტკიცების მიზნით საერთაშორისო საზოგადოების, პირველ ყოვლისა, ჩრდილო ატლანტიკური ხელშეკრულების ორგანიზაციის, კვლავაც აქტიურ ჩართულობას. ხაზგასმით მსურს აღვნიშნო, რომ განცდილი მძიმე დანაკლისის მიუხედავად, საქართველო კვლავინდებურად მზადაა, განაგრძოს ღირსეული წვლილის შეტანა ამ უმნიშვნელოვანეს ოპერაციაში”, - ნათქვამია საგარეო საქმეთა სამინისტროს განცხადებაში.