თავდაცვის სამინისტრო ბარაკ ობამას განცხადებას მიესალმება

პოლიტიკა - 18:51, 28 May, 2014

1479

თავდაცვის სამინისტროში აცხადებენ, რომ საქართველო გამოხატავს მზადყოფნას, განუხრელად გააგრძელოს მოკავშირეების ერთობლივი ძალისხმევის მხარდაჭერა ავღანეთში სტაბილურობის უზრუნველყოფის საქმეში.

“საქართველოს თავდაცვის სამინისტრო მიესალმება ამერიკის შეერთებული შტატების პრეზიდენტის ბარაკ ობამას განცხადებას, 2014 წლის შემდგომ ავღანეთში ამერიკული სამხედრო კონტინგენტის შენარჩუნებასთან დაკავშირებით.
რაც კიდევ ერთხელ ადასტურებს აშშ-ის ურყევ ნებას და ძალისხმევას, ხელი შეუწყოს ავღანეთის უსაფრთხოებას, ერთიანობასა და დემოკრატიულ განვითარებას.
საქართველო, როგორც აშშ-ის სტრატეგიული პარტნიორი და ნატო-ს ასპირანტი ქვეყანა, გამოხატავს მზადყოფნას, განუხრელად გააგრძელოს მოკავშირეების ერთობლივი ძალისხმევის მხარდაჭერა ავღანეთში სტაბილურობის უზრუნველყოფის საქმეში.
ჩვენ გვეამაყება, რომ საქართველოს მნიშვნელოვანი წვლილი შეაქვს ავღანეთის დემოკრატიული აღმშენებელობის პროცესში, რისი ნათელი მაგალითიც არის მიმდინარე წლის 5 აპრილს ავღანეთში ჩატარებული საპრეზიდენტო და ადგილობრივი თვითმმართველობის არჩევნების პირველი რაუნდი.
2014 წლის ბოლომდე ქართული ქვედანაყოფები გააგრძელებენ ნატო-ს საერთაშორისო უსაფრთხოების მხარდამჭერი ძალების ოპერაციაში (ISAF) მონაწილეობას არსებული კონტინგენტით. საქართველო ასევე ადასტურებს მზადყოფნას, მოკავშირეების მხარდამხარ 2014 წლის შემდგომაც გააგრძელოს მნიშვნელოვანი წვლილის შეტანა გლობალური უსაფრთხოებისა და სტაბილურობის განმტკიცების პროცესში”, - ნათქვამია თავდაცვის სამინისტროს განცხადებაში.