აფხაზურმა ოპოზიციამ ალექსანდრე ანქვაბთან შეხვედრაზე იმ ეთნიკური ქართველების გასახლება მოითხოვა, რომელთაც აფხაზური პასპორტები დარღვევებით აქვთ მიღებული.

ამის შესახებ ადგილობრივი აფხაზური მედია იტყობინება. მათი ინფორმაციით, უკანონო პასპორტიზაციის სკანდალის შემდეგ, გალისა და ოჩამჩირის მკვიდრ არაერთ ქართველს ე.წ. აფხაზური პასპორტები ჩამოართვეს.

არსებული ინფორმაციით, ოპოზიციის წარმომადგელნებმა დე ფაქტო პრეზიდენტთან შეხვედრაზე გალისა და ტყვარჩელის რაიონის გამგებლების თანამდებობიდან გათავისუფლებაც მოითხოვეს.

გუშინ აფხაზური ტელევიზიის ეთერით მიმართვისას დე ფაქტო პრეზიდენტმა ალექსანდრე ანქვაბმაც ოპოზიციასთან შეხვედრის შესახებ ისაუბრა, თუმცა ქართველების გასახლების მოთხოვნასთან დაკავშირებით არაფერი უთქვამს.

"ჩვენთან ადმინისტრაციაში მოვიდნენ მომიტინგეთა საკოორდინაციო საბჭოს წევრები – რაულ ხაჯიმბა, ახრა ბჟანია და სხვები. ჩვენ გავმართეთ მოლაპარაკებები, თუ როგორ უნდა მოხდეს სიტუაციის ნორმალიზება. სხვადასხვა საკითხები განვიხილეთ. იყო კატეგორიული მოთხოვნებიც, რომ პოსტიდან უნდა გადავდგე. შემდეგ დავუბრუნდით იმ საკითხს, რომ შესაძლოა, უნდა გავათავისუფლოთ მინისტრთა კაბინეტი, ასევე, გენერალური პროკურორი და ორი რაიონის - გალისა და ტყვარჩელის რაიონების ხელმძღვანელები", - განაცხადა ალექსანდრე ანქვაბმა.