ექსპერტი მამუკა არეშიძე აფხაზეთში განვითარებულ მოვლენებს ეხმაურება.

არეშიძე მიიჩნევს, რომ პოლიტიკური პროტესტის მიზეზი აფხაზეთში მძიმე ეკონომიკური მდგომარეობაა.

ექსპერტის თქმით, აფხაზურმა ოპოზიციამ კარგად გამოიყენა ის ფაქტი, რომ ალექსანდრე ანქვაბმა რუსეთისგან მიღებული თანხა სოციალურ-ეკონომიკური პრობლემების მოგვარებისთვის არ გამოიყენა.

„აფხაზეთში მართლა ძალიან მძიმე სოციალური მდგომარეობაა. ანქვაბმა დაუშვა საბედისწერო შეცდომა, როდესაც ის ფული, რომელსაც მოსკოვიდან იღებდა, ინფრასტრუქტურის განვითარებაში გამოიყენა. მან შეგნებულად თავი აარიდა ეკონომიკის განვითარებას. ოპოზიციამ ეს კარგად გამოიყენა“, - განაცხადა არეშიძემ.

მისი თქმით, აფხაზეთში ახალი ხელისუფლების მოსვლის შემთხვევაში გალელი ქართველების ფუნდამენტური შევიწროვება მოხდება.

„უფრო სეპარატისტული და რუსეთზე ორიენტირებული ძალები იმარჯვებენ. ახალი ძალა, რომელიც ხელისუფლებაში მოვა ყველაფერს გააკეთებს იმისთვის, რომ გალელი ქართველების ეთნო-ფსიქოლოგია შეცვალოს და ყველაფერს გააკეთებს, რომ მათი შევიწროვება უფრო ფუნდამენტური გახდეს“, - განაცხადა არეშიძემ.