სახალხო დამცველი დიპლომატიურ კორპუსს საპარლამენტო ანგარიშს წარუდგენს

პოლიტიკა - 19:24, 27 May, 2014

855

სახალხო დამცველი უჩა ნანუაშვილი დღეს საერთაშორისო ორგანიზაციების, საქართველოში აკრედიტებული დიპლომატიური კორპუსისა და არასამთავრობო ორგანიზაციების წარმომადგენლებს საპარლამენტო ანგარიშს წარუდგენს.

შეხვედრა 11:00 საათზე, სასტუმრო "ქორთიარდ მერიოტში" გაიმართება.

ანგარიში მიმოიხილავს 2013 წელს ქვეყანაში ადამიანის უფლებათა და თავისუფლებათა დაცვის მდგომარეობას, ასევე, სამოქალაქო-პოლიტიკურ, ეკონომიკურ, სოციალურ და კულტურულ უფლებათა ფართო სპექტრს.

დოკუმენტში ყურადღება გამახვილებულია ადამიანის უფლებათა სფეროში გამოვლენილ დადებით და უარყოფით ტენდენციებზე, ასევე, თავმოყრილია სახალხო დამცველის მიერ ხელისუფლების სხვადასხვა შტოების მისამართით შემუშავებული ძირითადი რეკომენდაციები, რომელთა შესრულების დროულობასა და ხარისხზე მნიშვნელოვანწილად იქნება დამოკიდებული ადამიანის უფლებათა დაცვის მაღალი სტანდარტების დამკვიდრება ქვეყანაში.

2013 წელს 11 ათასზე მეტმა პირმა მიმართა სახალხო დამცველის ოფისს, რაც წინა წლებთან შედარებით გაორმაგებული მაჩვენებელია და მეტყველებს ოფისისადმი გაზრდილ მოლოდინებზე, დარღვეული უფლებების შესახებ საზოგადოების ცნობიერების ამაღლებასა და ქვეყანაში თავისუფალი გარემოს არსებობაზე.

საპარლამენტო ანგარიშის შემოკლებული ვერსია, რომელიც შეხვედრის მონაწილეებს დაურიგდებათ, 65 გვერდია. სრული ანგარიში პარლამენტს მიმდინარე წლის 31 მარტს გაიგზავნა.

მისი განხილვა უმაღლეს საკანონმდებლო ორგანოში ჯერ არ დაწყებულა. სახალხო დამცველის აპარატის ინფორმაციით, დოკუმენტზე მსჯელობის დაწყება პარლამენტში უახლოეს პერიოდში იგეგმება.