„ასოცირების ხელშეკრულების ხელმოწერა იმდენად მნიშვნელოვანი საკითხია, რომ მასზე არანაირი კითხვის ნიშანი არ უნდა დაისვას და მტკიცედ უნდა შევიდეს ძალაში“, - ამის შესახებ საქართველოს პრეზიდენტმა საკუთარი გადაწყვეტილების კომენტირებისას განაცხადა, რომლის მიხედვით ასოცირების ხელშეკრულებაზე ხელმოწერის უფლება პრემიერს გადაეცა.

მისი თქმით, „პრემიერ-მინისტრს უფლებამოსილება დაუთმო და ეს ისეთი მნიშვნელოვანი საკითხია, რომ კინკლაობა არ იქნება”

„სწორედ ამიტომ გადავწყვიტეთ, მაქსიმალურად მოვხსნათ ის კითხვები, რომელიც გაჩენილი იყო ამ მიმართულებით და ბუნებრივად გადავეცით ეს უფლება პრემიერს, შესაბამისად, ხელმოწერის შემდეგ არანაირი კითხვა არ იარსებებს“,– განაცხადა პრეზიდენტმა.

მისი თქმით, აღნიშნული თემა კონსულტაციებს არ საჭიროებს.

„ეს არის საკუთარი უფლებამოსილების დათმობა, შესაბამისად, ყოველგვარი კონსულტაციის გარეშე დავუთმე ეს უფლება პრემიერს იმისთვის, რომ არასოდეს გაჩნდეს კითხვები ამ ხელშეკრულებაზე. ეს შეთანხმება იქნება ხელმოწერილი და არც კინკლაობა იქნება“,– აღნიშნა გიორგი მარგველაშვილმა.

საქართველოს პრეზიდენტმა გიორგი მარგველაშვილმა პრემიერ ირაკლი ღარიბაშვილს ასოცირების ხელშეკრულებაზე ხელმოწერის უფლებამოსილება ერთჯერადად გადასცა.