საპარლამენტო უმრავლესობის ერთ-ერთი ლიდერი ვიქტორ დოლიძე პრეზიდენტის გადაწყვეტილებას ეხმაურება, რომლის მიხედვით ასოცირების ხელშეკრულებაზე ხელმოწერის უფლებამოსილება პრემიერს გადაეცა.

მისი თქმით, ნაკლებად მნიშვნელოვანია, ვინ მოაწერს ხელს ასოცირების შეთანხმებას.

"გარწმუნებთ, რომ პრეზიდენტის ადმინისტრაცია, მთავრობა, პარლამენტი ძალიან შეხმატკბილებულად, კოორდინირებულად მოქმედებენ და იმოქმედებენ ამ შეთანხმების მომავალში ხორცშესხმის თვალსაზრისით", - აღნიშნა დეპუტატმა.

მისი თქმით, კონსტიტუციურადაც სწორია, როდესაც ასეთ პასუხისმგებლობას იღებს მთავრობა და პრემიერ-მინისტრი აწერს ხელს ხელშეკრულებას.

საქართველოს პრეზიდენტმა გიორგი მარგველაშვილმა პრემიერ-მინისტრ ირაკლი ღარიბაშვილს ასოცირების ხელშეკრულებაზე ხელმოწერის ლეგიტიმურობა ერთჯერადად გადასცა.